Хацелі забіць Шольца: шакавальныя падрабязнасці няўдалага перавароту ў Нямеччыне

Экспэрты ўказваюць на сувязь путчыстаў з Расеяй.

У Нямеччыне мяцежнікі з радыкальнага руху «Грамадзяне Рэйха» планавалі забіць нямецкага канцлера Олафа Шольца. Радыкальны рух адмаўляе легітымнасць ФРГ і заклікае да зрынання федэральных устаноў.

Нямецкіх мяцежнікаў з праваэкстрэмісцкай арганізацыі Reichsbürger арыштавалі ў сераду, 7 снежня. Акрамя забойства Шольца яны планавалі спыніць пастаўкі электраэнэргіі ў краіне і хутка стварыць уласныя ўзброеныя сілы.

The New York Times са спасылкай на крыніцы ў нямецкай пракуратуры паведамляе, што змоўшчыкі хацелі забіць ці дэпартаваць яшчэ 17 высокапастаўленых нямецкіх палітыкаў, пераважна заканадаўцаў.

Радыкалы нават планавалі прызначыць так званым кіраўніком новай Рады 71-гадовага прынца Генрыха XIII. Апошні сцвярджае, што належыць да арыстакратычнага роду Ройсаў.

Яго план быў у тым, каб захапіць Нямеччыну, ператварыць яе ў манархію і заняць трон.

Паведамляецца, што некаторыя з больш як паўсотні падазраваных былі ўзброеныя. У ходзе паліцэйскіх рэйдаў канфіскавалі 50 адзінак зброі: арбалеты, стрэльбы, пісталеты, патроны і тактычныя камізэлькі.

Паліцыя сачыла за групоўкай з вясны. Нямецкія вартавыя парадку сцвярджаюць, што мяцежнікі купілі спадарожнікавыя тэлефоны, якімі хацелі скарыстацца пасля таго, як будзе выключана электразабеспячэнне па ўсёй краіне і тэлекамунікацыйная сетка.

Дэпутат ад «Партыі зялёных» Сара Нані заявіла, што спроба радыкалаў учыніць пераварот, хоць і была дурной, але ўсё адно застаецца небяспечнай.

«Працягваюць з'яўляцца дадатковыя падрабязнасці, якія ставяць пад сумнеў тое, ці былі гэтыя людзі дастаткова разумнымі, каб спланаваць і здзейсніць такі пераварот. Але факт застаецца фактам: якія б дурныя ні былі іх ідэі і безнадзейныя іх планы, нават гэтая спроба небяспечная» , – заявіла яна.

Што вядома аб планаванні перавароту ў Нямеччыне

Нямецкія праваахоўнікі правялі спецаперацыю супраць экстрэмістаў, якія планавалі выкрадаць палітыкаў і штурмаваць Бундэстаг. Ператрусы прайшлі ў 130 кватэрах, офісах і складскіх памяшканнях, у тым ліку казармах Камандавання сіл спецыяльнага прызначэння ў Кальве.

Пад следствам за сяброўства або падтрымку тэрарыстычнай арганізацыі знаходзяцца 52 падазроныя.

Групоўка экстрэмістаў, якая планавала правесці дзяржаўны пераварот у Нямеччыне, была падзеленая на 2 групы: цывільную частку з унутранай назвай «Рада» і вайсковую частку - «ценявы ўрад», які таксама называлі «Новае нямецкае войска».

У склад «Новага нямецкага войска» ўвайшлі некалькі былых і сама меней адзін дзейны вайсковец Бундэсвера.

Экспэрты ўказваюць на сувязь змоўшчыкаў з Крамлём.