Расейскае войска разгарнула ў Беларусі гарматы «Гіяцынт-Б»
4- 9.12.2022, 9:10
- 16,958
Страляюць удзень і ўночы.
Расейскія вайскоўцы працягваюць «трэніравацца» на беларускіх палігонах. Пра гэта паведамляе прэс-служба Мінабароны РФ.
«На палігоне ў Беларусі вайскоўцы падраздзяленняў ЗВА выканалі баявыя стрэлы са 152-мм гармат «Гіяцынт-Б», - гаворыцца ў паведамленні.
Таксама адзначаецца, што «расейскія вайскоўцы, якія ўваходзяць у склад рэгіянальнай групоўкі войскаў, працягваюць курс інтэнсіўнай баявой падрыхтоўкі на палігонах узброеных сіл Рэспублікі Беларусь».
«Заняткі праводзяцца ўдзень і ўночы. Вайскоўцы ўдасканальваюць стралы са штатнай зброі, водзяць баявыя машыны, праходзяць псіхалагічную паласу перашкод і вывучаюць тактычную медыцыну», - дадалі ў расейскім ведамстве.
Напярэдадні Мінабароны РФ таксама паказала трэніроўку сваіх жаўнераў у Беларусі. На відэа патрапіла БМП са сцягам самаабвешчанай «ДНР».