74-гадовую палітычную зняволеную Наталлю Таран перавялі ў гомельскую калонію

Ейная справа разглядалася ў закрытым рэжыме.

74-гадовая палітычная зняволеная Наталля Таран этапаваная ў калонію, паведамілі ў праваабарончым цэнтры «Вясна».

Крымінальная справа разглядалася ў закрытым рэжыме. Са звестак праваабаронцаў, жанчыну абвінавацілі ў паклёпе на Аляксандра Лукашэнку (арт. 367 КК РБ), абразе Аляксандра Лукашэнкі (арт. 368 КК РБ), а таксама абразе службовай асобы пры выкананні ёй службовых паўнамоцтваў (арт. 369 КК РБ).

Да прысуду суда жанчына знаходзілася пад падпіскай аб нявыездзе і належных паводзінах.

Суддзя Вольга Серакова прызнала Наталлю Таран вінаватай па ўсіх пунктах абвінавачання і прызначыла ёй тры з паловай гады калоніі агульнага рэжыму.

Нядаўна жанчына была пераведзеная ў гомельскую жаночую калонію №4.