Нямеччына перадасць Украіне САУ RCH-155: што пра іх вядома

Гэта першыя ў свеце гаўбіцы, якія могуць страляць у руху.

Нямеччына перадасць Украіне 18 самаходных артылерыйскіх установак (САУ) RCH-155. Гэта першыя ў свеце гаўбіцы, якія могуць страляць у руху, паведамляе ТСН.

Гісторыя стварэння САУ RCH-155

Гармату-гаўбіцу RCH-155 распрацоўвае нямецкі канцэрн Krauss-Maffei Wegmann. Яна з'яўляецца сістэмным развіццём PzH 2000 - 155-мм САУ, якую прынялі на ўзбраенне ў Нямеччыне ў 1998 годзе.

Новая самаходная артылерыйская ўстаноўка з'яўляецца больш мабільнай і лёгкай дзякуючы таму, што яна вырабляецца з колавым шасі. Таксама да сістэмы можна адаптаваць карацейшую гармату — 155 мм/L39 ці нават 105 мм.

Асноўныя характарыстыкі

САУ RCH-155 - колавая самаходная артылерыйская ўстаноўка, якая мае гармату Rheinmetall L52 калібрам 155 мм і заяўленай далёкасцю стральбы да 54 км высокадакладнымі набоямі V-LAP (стандартнымі боепрыпасамі - да 40 км). Праз хвіліну гармата можа зрабіць дзевяць стрэлаў. Таксама RCH-155 абсталёўваецца аўтаматычнай сістэмай сілкавання з боекамплектам 30 падрыхтаваных і 144 модульных набояў.

Разганяецца САУ да 100 км/г, а на адной запраўцы можа перамяшчацца амаль 700 км.

Да асноўных тактыка-тэхнічных характарыстык можна таксама аднесці:

- колавая формула 8*8 (выкарыстоўваецца шасі Iveco);

- рухавік - дызельны MTU 199TE20;

- даўжыня ствала - 7,88 м 52 калібру;

- даўжыня - 10,4 м;

- шырыня - 2,99 м;

- вышыня - 3,6 м;

- вага - 39 т;

- магутнасць рухавіка - 815 к.с;

- платформа бронетранспарцёра - Boxer;

- колькасць экіпажа - 2 (кіроўца і камандзір).

Дадаткова корпус абсталёўваецца модульнай бранёй і дадатковымі керамічнымі ўстаўкамі для абароны капсулы экіпажа.

Кошт адной адзінкі САУ RCH-155 – 12 млн еўраў.

Перавагі САУ RCH-155: меркаванне экспэрта

Аб перавагах зброі распавёў вайскова-палітычны аглядальнік Аляксандр Каваленка.

З ягоных слоў, асноўная перавага RCH-155 менавіта ў тым, што гэта першая ў свеце САУ, здольная страляць у руху. Трэба адзначыць, што рух базы не ўплывае на дакладнасць артылерыі. Таму гэтая САУ можа быць цалкам няўлоўнай падчас правядзення контрбатарэйнай барацьбы ворагам.

Экспэрт дадаў, што САУ RCH-155 у многіх момантах вельмі падобная да Panzerhaubitze 2000, якую Літва падала Украіне разам з боепрыпасамі. Напрыклад, у тых жа аднолькавых ствалах L52. А яшчэ абедзве САУ могуць выкарыстоўваць набоі Smart.