У Быхаве ліквідуюць кансервавы завод
17- 9.12.2022, 19:10
- 11,354
Завод працаваў у мінус.
Эканамічны суд Магілёўскай вобласці прыняў пастанову пра ліквідацыю ААТ "Быхаўскі кансервава-агароднінасушыльны завод" (брэнд "Гаспадар-барын").
Агульная сума пазык прадпрыемства – амаль 11,4 млн рублёў. У вольным доступе самая свежая справаздача кампаніі – за 2018 год. Дакумент паказвае, што завод працаваў у мінусе.
У пастанове суда адзначана, што ў 2021 годзе аб'ём вытворчасці ўпаў амаль напалову ў параўнанні з 2020 годам. Выпускаліся ў асноўным кансерваваныя гарошак, кукуруза, ікра з кабачкоў і бярозавы сок.
Таксама "Гаспадар-барын" у 2020 годзе страціў пазіцыі на рынку дзяржзакупак. Потым прадпрыемства зноў здолела патрапіць у спіс пастаўшчыкоў, але ў 2022 годзе месячная выручка склала блізу 530 тысячаў рублёў пры плане 1,5 млн рублёў.
У судовых дакументах адзначана, што ў пэўны перыяд давальніцкую сыравіну (гарох і кукуруза) перапрацоўвалі ніжэй за сабекошт. Гэтыя і іншыя прычыны прывялі да цяперашняй ліквідацыі.
Частка маёмасці ААТ ужо прададзеная. Напрыклад, гэта гаражы, крамы і іншая нерухомасць у Быхаве, а таксама склады ў Быхаўскім раёне. Аднак для выплаты пазык атрыманых сродкаў не хапіла.