Украіна і пажарная машына

Будзеце купляць новыя брандспойты замест таго, каб тушыць пажар?

Поспехі NАТО з пачатку расейскай захопніцкай вайны ў Еўропе, - прабачце, спецаперацыі на Украіне, - уражваюць.

Сапраўды, глядзіце: зараз у Еўропе дыслакуецца NАТОскі кантынгент колькасцю ўжо 40 000 вайскоўцаў.

Малайцы ж. Не так даўно было ўсяго 13 000. І ЗША малайцы, у іх ужо 100 000 вайскоўцаў у Еўропе ў параўнанні з 30 тысячамі ў 2016 годзе. Асабліва малайчына Байдэн, які вярнуў Амерыку ў NАТО.

А вось Макрон не дужа малайчына. Ён быў узяўся ўсё перабудоўваць у Еўропе і пару гадоў таму нават канстатаваў «смерць NАТОўскага мозгу», ківаючы, што ён і ёсць брыгада рэаніматолагаў. Але вось калі прабіла ягоная гадзіна, калі галоўны супраціўнік NАТО ўварваўся ва Украіну, ён раптам захапіўся замірэннем праз тэлефон гэтага самага супраціўніка і неяк уцягнуўся ў гэтую справу.

Я, дарэчы, з Макронам згодзен толькі часткова: атрафіравалася толькі палітычная частка NАТОўскага мозгу; вайсковая і стратэгічная працуе вельмі прафесійна і адэкватна, а вось палітыкі не спяшаюцца прыслухоўвацца да аналітычных выкладак вайскоўцаў.

А наогул, NАТО цешыць. Яны поўным ходам распрацоўваюць планы абароны агульнай тэрыторыі сваіх чальцоў. У іх з'явіліся шыкоўныя мабілізацыйныя планы, якія дазваляюць у самыя кароткія тэрміны стаць сцяной супраць агрэсара. Яны файна мадэрнізуюць свае ўзбраенні, тым больш што вызначанай умовай ангажаванасці ЗША ва ўмацаванні абараназдольнасці чальцоў NАТО з'яўляецца закупка ў ЗША знішчальнікаў F-35.

Затое нават наяўныя ва ўсходнееўрапейскіх чальцоў NАТО МІГі-29 ЗША катэгарычна забараняюць пастаўляць Украіне.

NАТО, праўда, малайцы. Ім вельмі пашанцавала з цяперашнім генеральным сакратаром Енсам Столтэнбэргам. Без іроніі. Ён вельмі дакладна расстаўляе акцэнты. Не толькі ў сувязі з вайной ва Украіне. Ён гэта рабіў задоўга да 24 лютага 2022 года. Але ён выканаўца волі палітыкаў, а волі не ставала. І ўсё адно, гэта вельмі добра, што сёння генеральны сакратар NАТО дасведчаны і прафесійны Столтэнбэрг.

Аднак сам Альянс заблытаўся ў сваіх мінулых канцэпцыях, - стрымлівання, суіснавання, дыпламатычнага ўрэгулявання, - і ніяк з іх не выберацца.

Асноўны тэатр размяшчэння войскаў NАТО - Еўропа. Асноўны чыннік стабільнасці і міжнароднага міру - адсутнасць канфлікту ў Еўропе. Вайна сёння ідзе ў Еўропе, дзе знаходзіцца самая магутная і сучасная ў свеце групоўка. Якая што?

Украіна просіць: закрыйце неба, вы гэта ўжо рабілі раней у іншых частках свету. Адказ - не можам. Ужо нават не Украіна просіць, а сусветная грамадскасць праз разнастайныя петыцыі, дэкларацыі, звароты. Адказ той жа.

Украіна просіць: пастаўце ўзбраенні не па рэшткавым прынцыпе, а так, каб даць зразумець агрэсару, што ў яго няма шанцаў. Адказ? Ну, вы самі ведаеце.

Недзе наткнуўся на тое, як адзін ці былы, ці цяперашні высокапастаўлены супрацоўнік NАТО вобразна апісаў Альянс: гэта такая суперсучасная пажарная машына, якая стаіць у дэпо, нікуды не выязджае, на яе наважваюць усё новае і новае абсталявання для тушэння пажараў, але паколькі пажараў у зоне адказнасці гэтай машыны няма, яна так з дэпо і не выязджае.

Ён яшчэ дадаў, што людзі скардзяцца, што такая машына дорага каштуе, не разумеюць, што яна іх выратуе ў выпадку пажару ў іх дамах.

Гэта вельмі смешна, і вельмі страшна, і гэта дакладнае апісанне сённяшняга NАТО.

Пажар ужо здарыўся. Так, ён за мяжой вашага раёна, але мяжа праходзіць па задняй сценцы вашага пажарнага дэпо, яна вось-вось абрынецца. І што? Будзеце купляць новыя брандспойты замест таго, каб тушыць пажар?

Мяне доўгі час турбуе нежаданне нармальных, разумных дзяржаў учытвацца ў нормы права.

Так, сапраўды, Вашынгтонская дамова ад 4 красавіка 1949 гады ўстанаўлівае зону дзеянняў NАТО ў межах тэрыторый краін-сябраў. Але зона адказнасці - міжнародная бяспека і міжнародны мір. Учытайцеся ў яе, шаноўныя NАТОўцы! Там проста з першага артыкула ідуць адсылкі на Статут ААН. А Статут ААН недвухсэнсоўна кажа пра «неад'емнае права на індывідуальную або калектыўную самаабарону, калі адбудзецца ўзброены напад на чальца Арганізацыі, да таго часу, пакуль Рада Бяспекі не прыме мер, неабходных для падтрымання міжнароднага міру і бяспекі».

А Рада бяспекі не прыняла і не прыме (пры вета Расеі) такіх мер, хаця там сярод сталых чальцоў большасць сябраў NАТО.

І як зараз быць?

На мой погляд, адказ відавочны: выкарыстанне вайсковага патэнцыялу NАТО (гэта я паліткарэктна, каб не забанілі) для спынення вайны ў Еўропе і пакарання агрэсара.

Фіяска ў Сірыі і катастрофа ў Афганістане проста не пакідаюць іншых варыянтаў развязання для выратавання нашага з вамі свету.

Ва Украіне, вядома, усё не так і ўсё не згодна са стандартамі, але менавіта ўкраінцы сёння ратуюць свет, а NАТО мые пажарную машыну.

Андрэй Саннікаў, «Фэйсбук»