Беларуска з'ехала з дзіцем з краіны – праз тры тыдні ў яе запатрабавалі вярнуць дапамогу

Жанчына абышлася з ФСАН «паводле закону» і паплацілася за гэта.

У Алы (імя змененае на просьбу гераіні) двое маленькіх дзяцей – 2 і 5 гадоў. Жанчына з'ехала з імі з Беларусі ў Грузію ў сакавіку сёлета, не маючы ні найменшага ведання, наколькі задоўжыцца гэтае падарожжа. У траўні стала зразумела, што вяртанне дадому будзе няхуткім, і яна пастанавіла зрабіць сумленна: папярэдзіць ФСАН, што яна знаходзіцца з дзецьмі за мяжой і праз два месяцы ёй больш не павінны налічваць дапамогу. На што ФСАН запатрабаваў вярнуць ужо выплачаную за красавік дапамогу, піша onliner.by.

«Гэта нечакана і непрыемна»

Паводле словаў жанчыны, яна ведала, што, выязджаючы з дзіцем за мяжу надоўга, павінна паведаміць пра гэта ў ФСАН. І як толькі зразумела, што паездка не будзе кароткай – адразу гэта зрабіла.

– Калі мы з'язджалі з Беларусі, то не ведалі дакладна, колькі прабудзем у Грузіі: месяц, два месяцы, паўгода ці даўжэй. Я ведала, што дзіця, на якое налічваецца дапамога, павінна знаходзіцца на тэрыторыі Беларусі паўгода. Ужо ў Грузіі даведалася, што калі дзіця ў ад'ездзе больш за два месяцы, то дапамога на яго не налічваецца. Гэта значыць, гаворка не пра паўгода ўжо, а пра два месяцы. Але і гэта яшчэ не ўсё. Мы паляцелі з Беларусі ў пачатку сакавіка, значыць, два месяцы мінулі ў пачатку траўня. Разумеючы, што затрымаемся тут на даўжэйшы тэрмін, я папрасіла сястру патэлефанаваць у ФСАН і даведацца, як адмовіцца ад дапамогі, гэта значыць проста паступіць сумленна. Там адказалі, што ў сувязі з пераездам у іншую краіну тэрмінам больш за два месяцы мне трэба напісаць заяву на адмову ад дапамогі. І яе спыняюць выплачваць з 1 красавіка! Гэта значыць, фактычна пасля нашага ад'езду ў пачатку сакавіка мяне пазбавілі дапамогі не праз два месяцы, а праз тры тыдні. Больш за тое, за другі месяц мне трэба вярнуць грошы. Гэта нечакана і непрыемна, тым больш калі маму ў дэкрэце проста пазбаўляюць дапамогі, – расказвае жанчына.

Ала здзіўляецца, чаму дзеці ўжо не маюць права на дапамогу, бо яны з мужам хоць і знаходзяцца ў Грузіі, але яна яшчэ нядаўна плаціла падаткі, а яе муж і цяпер прадаўжае працаваць на Беларусь і плаціць у краіну падаткі.

– Збольшага дапамога для догляду дзіцяці – гэта «заробак» для аднаго з бацькоў, які даглядае нованароджанага да дзіцячага садка. Калі ў вас двое і больш дзяцей, дзе аднаму яшчэ няма трох, а другому няма 18, то і на другога налічваецца невялікая сума. У мяне атрымлівалася 616,64 рубля на малодшага і 155,58 рубля – на старэйшага. Разам на дваіх дзяцей – крыху больш за 772 рублёў. Зразумелая рэч, такой дапамогі мала на што стае, і без дапамогі ці падпрацоўкі пражыць будзе складана. Але я ведаю, што з усім спраўлюся і знайду спосабы, як зарабляць нават у іншай краіне з двума маленькімі дзецьмі... Ад ФСАН мне нічога не трэба, я проста хачу, каб іншыя людзі таксама ведалі пра гэта і былі гатовыя да пазбаўлення дапамогі, – кажа беларуска.

Юрыстка: «Нават калі вы выехалі 30 сакавіка, выплаты спыняцца з 1 красавіка»

Усе ўмовы выплаты дапамог указаныя ў Законе «Аб дзяржаўных дапамогах сем'ям, якія выхоўваюць дзяцей». Паводле словаў юрысткі ў працоўным і бізнэс-праве Святланы Семяніхінай, дакумент дзейнічае не першы год, але многія да гэтага часу няправільна яго разумеюць.

– Сітуацыя непрыемная, але такі закон, яго ў гэтым выпадку ў ФСАН не парушылі. Дапамогу перастаюць выплачваць не пасля двух месяцаў знаходжання, а з першага дня наступнага за ад'ездам месяца, гэта значыць, нават калі вы выехалі 30 сакавіка, то выплаты спыняцца з 1 красавіка (калі не прыехаць назад цягам двух месяцаў). Больш за тое, жанчына выехала з дзіцем да трох гадоў за мяжу ў сакавіку, і паведаміць пра гэта ФСАН трэба было не пазней за пяць дзён з даты выезду. Вядома, паведамляць пра гэта, калі адпраўляецеся на 10 дзён у адпачынак за мяжу, сэнсу няма, але калі выязджаеце з краіны з магчымасцю няхуткага вяртання, лепш паведаміць ФСАН. Гэта робіць наймальнік (калі бацька ўважаецца за работніка) ці сам чалавек (калі да дэкрэтнага адпачынку ён нідзе не працаваў). ФСАН у любым выпадку спраўджваецца са спісамі з'ехалых на мытні, таму пра вас даведаюцца. Пытанне толькі ў тым, за які час вас пазбавяць дапамогі. Калі сказалі праз пяць дзён пасля выезду – дапамога перастане выплачвацца з 1 дня наступнага каляндарнага месяца, калі пра вас даведаліся пазней – могуць запатрабаваць вярнуць дапамогу і за першы месяц знаходжання ў чужой краіне, – каментуе юрыст.

ФСАН у любым выпадку спраўджваецца са спісамі з'ехалых на мытні, таму пра вас даведаюцца. Пытанне толькі ў тым, за які час вас пазбавяць дапамогі

Не хочаце вярнуць дапамогу – яе здымуць з прыбытку прымусова. Што трэба ведаць пра дапамогу, з'язджаючы за мяжу?

Усе ўмовы выплаты дапамог указаныя ў Законе «Аб дзяржаўнай дапамозе сем'ям, якія выхоўваюць дзяцей». У дакуменце ўказана, што выплата дапамогі спыняецца на дзяцей, якія выехалі за мяжу:

для пражывання ці навучання на дзённай форме навучання,

на тэрмін большы за два месяцы (за выключэннем дзяцей, бацькі якіх дыпламаты і консулы за мяжой),

для атрымання медыцынскай дапамогі,

і пры гэтым пражываюць і зарэгістраваныя на месцы знаходжання ў Беларусі, але не маюць тут рэгістрацыі на месцы жыхарства ў сувязі з сталым пражываннем за яе межамі.

Атрымальнік дапамогі пры гэтым абавязаны паведамляць пра абставіны, якія змяняюць памер або спыняюць выплаты, не пазней за 5 каляндарных дзён пасля дня іх наступлення. Гэта значыць, калі бацька ў дэкрэце ўладкаваўся працаваць больш як на палову стаўкі або выехаў з дзіцем за мяжу больш як на 2 месяцы, ён сам (або ягоны наймальнік) павінен паведаміць пра гэта.

Пры выездзе дзіцяці за мяжу на два месяцы або больш выплата дапамогі спыняецца з 1 дня месяца, наступнага за месяцам выезду, калі атрымальнік дапамогі паведаміў пра гэта цягам 5 каляндарных дзён з дня выезду (п. 3 арт. 24 Закона). Калі не паведаміў або паведаміў пазней, выплачаную дапамогу могуць запатрабаваць вярнуць. Прычым з дня выезду дзіцяці і да канца месяца, у які тое вярнулася ў Беларусь.

Не хочаце вярнуць добраахвотна – суму аднімуць з любога іншага вашага прыбытку.

Калі вы вярнуліся ў Беларусь, трэба зноў звярнуцца ў ФСАН па аднаўленне выплаты. Аўтаматычна дапамогу вам не стануць выплачваць.

Пры гэтым бацькі з дзіцем могуць падарожнічаць і атрымліваць дапамогу, калі выконваюцца дзве ўмовы: неабходна не менш як 183 дні сумарна за год правесці ў Беларусі, а за мяжой – менш як два месяцы запар. У гэтым выпадку дапамога будзе выплачвацца ўвесь час.