Расею раскрадаюць ударнымі тэмпамі

У крамах РФ пасля пачатку вайны рэзка вырасла колькасць крадзяжоў

На тэрыторыі Расеі ў лютым-красавіку 2022 года рэзка вырасла колькасць крадзяжоў у крамах. Сярэдняя сума скрадзеных тавараў склала блізу 1,5 тысячы рублёў, што на 25% больш, чым годам раней.

Пра гэта паведамляе РБК-Украина са спасылкай на звесткі NTechLab сістэмы распазнання твараў, што супрацоўнічае з рэтэйлерамі распрацоўшчыка.

У топ-5 катэгорый, якія ў лютым-красавіку сёлета часцей за ўсё прыцягвалі жыхароў Расеі, увайшлі кандытарскія вырабы (19% усіх крадзяжоў), каўбасы (16%), алкаголь (14%), сыры (13%), кава і какава (7%).

Трэндам стаў крадзеж тавараў на касах самаабслугоўвання. Колькасць удзельнікаў падобных махінацый за аналізаваны перыяд вырасла на 34%, канстатуе NTechLab.

У прадуктовых крамах тавары часцяком выкрадаюць адразу з кошыкам, адзначае NTechLab. Колькасць такіх злачынстваў павялічылася на 27 працэнтаў у параўнанні з аналагічным перыядам 2021 года.

«Цяпер выносяць усё, крадуць часцей і больш», – згодны топ-мэнэджар аднаго з найбуйнейшых харчовых рэтэйлераў. У кампаніі, для барацьбы з крадзяжамі ўзмацняюць ахову, настройваюць сістэмы відэаназірання і ставяць замкі на дарагія тавары, як у «традыцыйных» катэгорыях (дарагі алкаголь ці ікра), так і на абраную касметыку і прадметы бытавой хіміі.

«Як толькі эканоміка пачынае крыху здаваць, пачашчаюцца выпадкі крадзяжу», – пацвярджае кіраўнік справамі групы «Спортмайстар» Сяргей Агібалаў. У яго сетцы часцей за ўсё спрабуюць выкрасці прадукцыю дарагіх заходніх брэндаў: «мабыць, раз ужо рызыкаваць, то рызыкаваць па поўнай».