Трыумф Украіны на «Еўравізіі»: як рэагуюць сусветныя лідары
3- 15.05.2022, 12:31
- 9,358
Першым украінцаў павіншаваў прэм'ер Вялікай Брытаніі Барыс Джонсан.
Гурт Kalush Orchestra здабыў феерычную перамогу на Еўравізіі ў Турыне. Сусветныя лідары адразу ж павіншавалі ўкраінцаў з перамогай.
Першым Kalush Orchestra і Украіну павіншаваў прэм'ер Вялікай Брытаніі Барыс Джонсан.
«Віншуем Украіну з перамогай на Еўравізіі. Гэта яскравае адлюстраванне не толькі вашага таленту, але і непахіснай падтрымкі вашай барацьбы за свабоду», - адзначыў палітык.
Таксама ён павіншаваў брытанскага спевака Сэма Райдэра, які заняў другое месца, атрымаўшы 466 балаў. Джонсан заўважыў, што Райдэр бліскуча прэзентаваў сваю краіну.
Свае віншаванні ў твітары напісаў і высокі прадстаўнік ЕЗ у знешняй палітыцы і палітыцы бяспекі Жазэп Барэль.
«Віншую Украіну і Kalush Orchestra, вы перамаглі. Няхай жыве музыка! Няхай жыве Еўропа! Слава Украіне!», - напісаў Барэль.
Павіншавала Украіну і прэзідэнт Еўракамісіі Урсула фон дэр Ляен.
«Віншуем Kalush Orchestra і Украіну з перамогай на Еўравізіі. Сёння вечарам ваша песня скарыла наша сэрца. Мы святкуем вашу перамогу ва ўсім свеце. ЕЗ з вамі», - адзначыла прэзідэнт Еўракамісіі.
Акрамя таго, твіт з віншаваннямі з`явіўся і на афіцыйнай старонцы Еўракамісіі. Там заўважылі, што песня Stefania скарыла сэрцы ўсіх еўрапейцаў.
У сваю чаргу прэзідэнт Еўрапейскай Рады Шарль Мішэль напісаў віншаванні на ўкраінскай мове і працытаваў урывак песні Kalush Orchestra.
«Ламанымі дарогамі прыйду я заўсёды да цябе. Зычу, каб у наступным годзе Еўравізія праходзіла ў Кіеве ў свабоднай і саборнай Украіне», - напісаў Мішэль.
Такое ж пажаданне выказала кіраўніца Еўрапейскага парламента Раберта Мецола.
«Віншуем Kalush Orchestra і Украіну! Налета ў Кіеве - у свабоднай Украіне. Я буду там. Слава Украіне!», - адзначыла прэзідэнт Еўрапарламента.