1 лiпеня 2022, Пятніца, 7:09
Сім сім, Хартыя 97!
Рубрыкі

Як беларусам зараз атрымаць шэнгенскую візу і колькі гэта будзе каштаваць?

1
Як беларусам зараз атрымаць шэнгенскую візу і колькі гэта будзе каштаваць?

Для многіх берасцейцаў шлях у «Шэнген» пачынаецца не з Тэрэспаля, а з Будапешта.

Адкрыццё межаў і паступовае зняцце ковідных абмежаванняў выклікала ў беларусаў падвышаную цікавасць да атрымання шэнгенскіх віз, бо за два гады пандэмійнай заслоны ў многіх тэрміны "шэнгена" скончыліся. Але вярнуцца да звыклых шляхоў у развязанні візавага пытання не атрымаецца – на змену ковіду прыйшлі палітычныя аспекты. Vb.by даведваўся, ці складана зараз у Берасці атрымаць шэнген і колькі гэта будзе каштаваць.

Гістарычны лідар у колькасці выдадзеных беларусам і берасцейцам шэнгенскіх віз - Польшча (да 360 тысяч на год у краіне). Здавалася б, збірай дакументы і адпраўляйся ў візавы цэнтр. Але зараз усё складаней. На пачатак траўня Польшча адкрывае толькі нацыянальныя візы: працоўныя, навучальныя, гуманітарныя і для «карты паляка».

Ёсць варыянт з гасцявымі візамі - на запрашэнне блізкага сваяка, - але гэтую магчымасць трэба спачатку ўзгадняць з консулам у Берасці. А вось самая папулярная «турыстычная» віза застаецца недаступнай на нявызначаны тэрмін.

Дапушчальны, патрэбны вам варыянт польскай візы ўсё ж знайшоўся. Тады ёсць два варыянты: самастойна запісвацца ў візавы цэнтр ці звяртацца да пасярэднікаў. Першае - задача не з простых, свабодных месцаў там практычна няма. Журналісты паспрабавалі запісацца раніцай у сераду, але беспаспяхова. Напісалі пасярэднікам. Тыя прапануюць дапамогу ў афармленні запрашэння, якое спросціць задачу атрымання візы. Але каштуе такая паслуга 800 рублёў. І гэта да выплаты консульскага збору на 35 еўра і іншых спадарожных плацяжоў.

Калі ў вас ёсць запрашэнне на працу, то пасярэднік дапаможа запісацца на прыём у візавы цэнтр і падрыхтаваць анкету і іншыя дакументы. Праўда, кліента адразу папярэджваюць - тэрмін чакання запісу на падачу можа быць ад тыдня да некалькіх месяцаў, а паслугі пасярэдніка пры гэтым складуць 500 рублёў.

А калі не Польшча?

Шмат берасцейцаў, хто звярнуўся да пасрэднікаў, пачытаўшы папярэдне навіны, адразу ўдакладняюць – нам не важна, якой менавіта краіны будзе шэнгенская віза. Галоўнае - атрымаць яе. Тут ужо прасторы для манеўру большыя. Краіны Балтыі зусім закрытыя, але турыстычныя візы афармляе Вугоршчына, напрыклад. Мясцовыя турфірмы хутка зарыентаваліся - зараз некаторыя з іх прапануюць правесці выходныя ў Будапешце, адначасна аформіўшы шматразовую шэнгенскую візу. Просяць за такія вакацыі блізу 160 еўраў.

Атрымаць турыстычныя візы можна ў некаторых краінах (акрамя Вугоршчыны гэта Італія, Гішпанія, Аўстрыя, але ў кожным выпадку ёсць нюансы) можна і індывідуальна, без набыцця тура выхаднога дня. Трэба будзе падаць у візавы цэнтр аплачаную рэзервацыю гатэля. Тут таксама ёсць імавернасць атрымаць шматразовы шэнген. Трэба памятаць, што і ў гэтым выпадку самастойна запісацца на падачу дакументаў не так проста праз ажыятажны попыту. Але тут і паслугі пасярэднікаў таннейшыя - блізу 200 рублёў на чалавека за дапамогу ў запісе на прыём і падрыхтоўку дакументаў. Пры гэтым найбліжэйшая дата падачы дакументаў на атрыманне італьянскай візы ўжо ў ліпені, а па гішпанскую давядзецца ехаць у Маскву.

Сітуацыя з візамі і ковіднымі абмежаваннямі пастаянна мяняецца - актуальную інфармацыю трэба ўдакладняць у пасольствах або візавых цэнтрах.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».