МУС Украіны: Змена губернатараў у Расеі можа прывесці да канфліктаў

Група, якая адказвала за ўкраінскае пытанне, страціла свой уплыў.

Змена шэрагу губернатараў у Расеі можа прывесці да пэўных канфліктаў, але прэзідэнта Уладзіміра Пуціна ніхто зрынаць не будзе.

Пра гэта дарадца міністра ўнутраных спраў Украіны Вадзім Дзенісенка сказаў на брыфінгу ў каментары змены губернатараў у РФ, піша УНИАН.

«Можам дакладна казаць аб тым, што чацвёра з іх - гэта парашутысты, якія прыйшлі з іншых рэгіёнаў. На змену ім прыходзяць такія ж парашутысты, гэта значыць, людзі з іншых рэгіёнаў. Гэта цалкам упісваецца ў тую тэндэнцыю, якая пачалася ў РФ прыкладна два гады таму, калі пачалася «зачыстка рэгіянальных эліт», - адзначыў Дзенісенка.

З ягоных слоў, усе нованазначаныя людзі належаць да так званай групы тэхнакратаў. Ён дадаў, на сёння ў Расеі назіраецца змена эліт. «Пакуль яны малапрыкметныя, але ўжо цяпер можна гаварыць, што так званая група Дзмітрыя Козака, якая ў свой час адказвала цалкам за ўкраінскае пытанне, пытанне прыгранічча РФ, калі яна не адышла ў нябыт, то страціла свой уплыў на сённяшні момант», - мяркуе Дзенісенка.

Дарадца міністра ўнутраных спраў Украіны дадаў, што Сяргея Кірыенку называюць адказным за Данбас і «не толькі за Данбас».

«Насамрэч, пакуль роля Кірыенкі палягае ў тым, што ён прыехаў сюды з інспекцыяй. І ў Херсонскай вобласці, і на акупаваных тэрыторыях Данбаса. Ён павінен быў скласці разуменне для Пуціна, што насамрэч там адбываецца. Бо пасля правальнай першай стадыі вайны Пуцін усвядоміў, што ён не ведае, што адбываецца ва Украіне», - дадаў Дзенісенка. Ён растлумачыў, што Кірыенка з’яўляецца адным з лідараў групы тэхнакратаў РФ. Пры гэтым Дзенісенка падкрэсліў, што цяпер нельга казаць, што ў расейскіх элітах адбыўся «тэктанічны зрух», але можна казаць аб тым, што група тэхнакратаў, і асабліва Кірыенка, «набываюць пэўную суб'ектнасць» - яны становяцца дакладна вызначальнымі для ўсіх сфер жыцця, акрамя міжнароднай палітыкі і абароны. «Яны могуць стаць адказнымі за палітыку не толькі акупаваных тэрыторый Украіны, але Малдовы і Грузіі. І мы можам казаць пра тое, што гэтая група пачынае набываць пэўныя, скажам так, не проста суб'ектныя палітычныя рычагі ўплыву, але яна становіцца нароўні са шматлікімі групамі «старэйшага пакалення», якія прыйшлі з Пуціным яшчэ 20 гадоў таму да ўлады», - адзначыў дарадца кіраўніка МУС.

Дзенісенка падкрэсліў, што нельга казаць аб тым, што гэтыя групы будуць ваяваць паміж сабой і «зрынаць Пуціна». «Але тое, што адна з маладых груп набывае суб'ектнасць, за гэтым трэба глядзець, і гэта абавязкова прывядзе да пэўных канфліктаў у нейкіх «шэрых зонах расейскай палітыкі», - дадаў ён.

Як вядома, 10 траўня губернатары пяці рэгіёнаў Расейскай Федэрацыі падалі ў адстаўку, зрэшты, Саратаўскай, Томскай, Кіраўскай абласцей, а таксама кіраўнік Рэспублікі Марый Эл.