Скандальны дэпутат Нестар Шуфрыч уцёк з Украіны

У дачыненні да народнага дэпутата прарасейскай партыі «АПЗЖ» распачалі крымінальную вытворчасць.

Народны дэпутат ад ужо былой прарасейскай партыі «АПЗЖ» Нестар Шуфрыч пакінуў Украіну, паведамляе unian.net.

Пра гэта заявіў начальнік Чарнавіцкай АВА Сяргей Асачук падчас сённяшняй прэс-канферэнцыі.

Ён не распавёў падрабязнасцяў, толькі адзначыў - валодае інфармацыяй, што Нестар Шуфрыч перасёк мяжу праз КПП «Парубнае».

Кіраўнік абладміністрацыі таксама звярнуў увагу, што шэраг мясцовых дэпутатаў ад АПЗЖ у Чарнавіцкай вобласці хаваюцца ад мабілізацыі.

Што папярэднічала

Нагадаем, 4 сакавіка стала вядома пра затрыманне Нестара Шуфрыча ў Кіеве. Са слоў вайскоўцаў, дэпутат фатаграфаваў пазіцыі тэрытарыяльнай абароны сталіцы. Ахова народнага дэпутата адкрыла агонь, але была затрыманая разам з Шуфрычам.

Сам сябра АПЗЖ, вядомы прарасейскімі поглядамі, сцвярджаў, што нібыта фатаграфаваў культурную славутасць Кіева.

Пазней у дачыненні да Шуфрыча распачалі крымінальную вытворчасць. Дэпутат наважыў ратаваць сваю свабоду ўцёкамі за мяжу, нягледзячы на забарону на выезд з краіны асоб мужчынскага полу ва ўзросце ад 18 да 60 гадоў.