Навукоўцы навучыліся рабіць гарэлку з выкідаў вуглякіслага газу

Апроч гарэлкі з СО2 цяпер робяць парфуму і сродкі дэзінфекцыі.

У барах Манхэтэна наліваюць гарэлку маркі Air - прадукцыю стартапа Air Company, якая займаецца перапрацоўкай вуглякіслага газу, што трапляе ў атмасферу дзякуючы працы розных галін прамысловасці. Апроч гарэлкі з СО2 кампанія вырабляе парфуму і сродкі дэзінфекцыі. Сярод інвестараў кампаніі – Toyota Ventures.

«Мы працуем з партнёрамі, якія ўлоўліваюць гэты вуглякіслы газ перш, чым ён патрапіць у атмасферу, а затым выкарыстоўваем яго ў працэсе вытворчасці спіртных напояў, – сказаў Грэгары Канстанцін, сузаснавальнік і кіраўнік Air Company. - Відавочна, што гэта нашмат лепш для планеты - кожная створаная намі бутэлька выдаляе СО2 з планеты».

Працэс дыстыляцыі алкаголю традыцыйным спосабам не толькі суправаджаецца выкідамі забруджвальных рэчываў у атмасферу, але і выдаткоўвае вялікую колькасць вады - прыблізна 35 літраў трэба, каб атрымаць адзін літр дыстыляту, піша CNBC. Air Vodka вырабляецца ўсяго з двух інгрэдыентаў: вуглякіслага газу і вады. Падчас электролізу вада расшчапляецца на вадарод і кісларод, затым вадарод паступае ў «рэактар канверсіі вугляроду» разам з улоўленым СО2. Атрымліваецца этанол, які ў спалучэнні з вадой становіцца гарэлкай.

Праўда, вынік, як і многія зялёныя інавацыі, не танны. Бутэлька такой гарэлкі каштуе ў ЗША $65. Зрэшты, заможную публіку на Манхэтэне гэта не спыняе, сцвярджае Брэндан Бартлі, галоўны бармэн пітной установы Bathtub Gin.

У кампаніі ёсць і іншыя кірункі развіцця, акрамя гарэлкі і парфумерыі з СО2. «Гарэлка для нас - напраўду трамплін да ўсіх іншых прадуктаў і прамысловага выкарыстання нашай тэхналогіі», - сказаў Канстанцін. Улоўліванне вуглякіслага газу становіцца буйным бізнэсам, бо прадпрыемствы імкнуцца скараціць выдаткі і штрафы за выкід СО2 у атмасферу. На сёння Air Company прыцягнула ад інвестараў больш за $40 млн.

У 2019 годзе нямецкія навукоўцы прыдумалі просты спосаб выдалення з атмасферы вуглякіслага газу, адначасна атрымліваючы «цуд-матэрыял» графен. Працэс адбываецца пры атмасферным ціску і тэмпературы блізу 1000°C.