Міколу Аўтуховіча выдалілі з залы суда да канца разгляду
8- 18.05.2022, 18:27
- 10,270
Нібыта за парушэнне парадку ў судовым паседжанні.
Галоўнага фігуранта сфабрыкаванай крымінальнай справы ў дачыненні да "групы Міколы Аўтуховіча" выдалілі з залы суда да канца разгляду, паведамляюць лукашысцкія прапагандысты з АТН у сваім Telegram-канале.
"За парушэнне парадку ў судовым паседжанні суд вызначыў выдаліць Аўтуховіча з залы паседжання да канца разгляду", – піша АТН.
Паводле яго сцвярджэння, галоўны фігурант справы "неаднаразова перабіваў суддзю і выказваў непавагу да суда".
Акрамя таго, як паведамляе шэраг СМІ, з залы суда выдалены таксама яшчэ адзін фігурант справы – Уладзімір Гундар.
Як паведамлялася, 18 траўня ў турме №1 Гародні пачаўся судовы разгляд паводле крымінальнай справы ў дачыненні да так званай групы Міколы Аўтуховіча.
Агулам паводле справы праходзяць 12 чалавек. Аўтуховічу інкрымінаваныя некалькі артыкулаў КК, у тым ліку замах на захоп дзяржаўнай улады неканстытуцыйным шляхам і здрада дзяржаве.
Аўтуховіч і яшчэ некалькі чалавек былі затрыманыя ў снежні 2020. Іх абвінавацілі ў падпале дома міліцыянта ў Ваўкавыску і падрыў аўтамабіля ў Гародні.