Генерал СБУ: Увосень у Расеі ўзнікне новая вялізная праблема

Яна выходзіць за рамкі вайны ва Украіне.

Расея з улікам руху суседняй для яе Фінляндыі ў NATO будзе вымушана істотна ўзмацняць мяжу, праводзячы перагрупоўку войскаў.

Такі прагноз агучыў генерал-маёр СБУ ў запасе Віктар Ягун, піша «Сегодня».

«Калі яны не будуць гэта рабіць, тады незразумела, для чаго трэба было паднімаць рыторыку аб магчымасці ракетных удараў з боку Харкава ў бок Масквы. З боку Фінляндыі гэтая адлегласць значна бліжэйшая. Нават не з боку Фінляндыі - з боку Таліна ў Маскву бліжэй, чым з Харкава ў Маскву. Таму гэта была рыторыка. Скажыце праўду: вы не хочаце, каб Украіна была самастойнай. І на гэтым усё закрыць - ніводнага NATO вы напраўду не баіцеся», - кажа ён.

Са слоў генерала, расейцам варта баяцца Фінляндыі, бо яна мае дастаткова баяздольнае войска.

«Не такое вялікае, але ўсе ведаюць, чым скончылася жаданне Сталіна захапіць Фінляндыю. Нічым яно не скончылася - наадварот, атрымалі «па зубах». У гэтых умовах, улічваючы, што ЗША і Вялікая Брытанія падпісалі кароткачасовую дамову на магчымую абарону Фінляндыі і Швецыі ад Расеі падчас працэдуры ўступлення ў NATO, я думаю, што працэдура скончыцца да восені», - адзначыў Ягун.

У сувязі з гэтым, прагназуе ён, восенню ў РФ узнікне вялізная праблема.

«Фактычна яна будзе поўнасцю адрэзана ад якой-небудзь аператыўнай магчымасці. Паміж Кранштатам і Калінінградам яны будуць хадзіць па цэнтры фінскага заліва, груба кажучы. Таму гэта для іх вялікая праблема - будзе цікава назіраць, як яны на яе будуць рэагаваць», - растлумачыў ён.

Пашырэнне NATO

15 траўня стала вядома, што Фінляндыя і Швецыя афіцыйна наважылі ўступіць у NATO.

Расея і Турцыя асудзілі такую пастанову. Так, прэс-сакратар прэзідэнта РФ Дзмітрый Пяскоў заявіў, што ўступленне Швецыі і Фінляндыі ў NATO выклікае занепакоенасць у Крамля. Таксама ў РФ адкрыта прыстрашвалі абедзвюм краінам вайсковым уварваннем, калі яны наважацца на ўступленне ў NATO.

16 траўня прэзідэнт Расейскай Федэрацыі Уладзімір Пуцін сказаў, што адказ краіны на ўступленне ў NATO Швецыі і Фінляндыі будзе залежаць ад пашырэння інфраструктуры гэтага вайскова-палітычнага блока.

Прэзідэнт Турцыі (краіна з'яўляецца сябрам NATO) Рэджэп Тайіп Эрдаган нечакана заявіў, што Турцыя не можа падтрымаць пашырэнне NATO, таму што Фінляндыя і Швецыя з'яўляюцца «домам для многіх тэрарыстычных арганізацый».

Пазіцыя Турцыі ўжо выклікала здзіўленне сярод краін-партнёраў NATO. Між іншым, у Дзярждэпе ЗША ўжо заявілі, што «працуюць над праясненнем пазіцыі Турцыі што да патэнцыйнага ўступлення ў NATO Швецыі і Фінляндыі».

18 траўня Швецыя і Фінляндыя афіцыйна падалі заяўкі на ўступленне ў NATO.