Палову бюджэтных месцаў у медычных устнановах выдзяляць для мэтавага набору

Праз год гэтая лічба можа скласці да 80 працэнтаў.

Міністэрства аховы здароўя выдала загад, у якім распісала, колькі бюджэтных месцаў падчас сёлетняй уступнай кампаніі аддадуць пад мэтавы набор. У агульнай складанасці - 958. Мяркуючы па кантрольных лічбах прыёму медуніверсітэтаў, гэта палова ад усіх бюджэтных месцаў.

Колькасць мэтавага набору збіраюцца павялічваць. Праз год у медычных установах гэтая лічба можа скласці да 80 працэнтаў. А ўжо гэтым летам для мэтавага набору аддадуць палову ўсіх бясплатных месцаў, піша zerkalo.io.

Так, у Беларускі дзяржаўны медуніверсітэт плануюць набраць 340 абітурыентаў паводле мэтавага накіравання. 50 працэнтаў бюджэтных месцаў на ўсіх спецыяльнасцях аддадуць абітурыентам з накіраваннем ад арганізацый. Для прыкладу, на лячэбны факультэт жадаюць прыняць 240 бясплатнікаў, з іх паводле мэтавага накіравання 120, на стаматалагічным на 90 бюджэтных месцаў - 45 на мэтавы набор.

Падобны расклад і ў Гарадзенскім медуніверсітэце. Усяго сюды збіраюцца прыняць 220 абітаруентаў паводле мэтавага накіравання. На ўсіх спецыяльнасцях, акрамя «Сястрынскай справы», абітурыенты з накіраваннем зоймуць палову бюджэтных месцаў. Напрыклад, на лячэбным факультэце з 200 пазіцый ім аддадуць 100, на педыятрычным суадносіны 110 і 55.

У Віцебскі дзяржаўны ордэны Дружбы народаў медыцынскі ўніверсітэт сёлета плануюць набраць 218 цэлікаў. І гэта таксама, лічы, палова ад усіх бюджэтнікаў. Больш за ўсё па мэтавым накіраванні ў ВНУ прыме лячэбны факультэт і фармацэўтычны.

У Гомельскім медуніверсітэце летам 2022-га вакантнымі будуць 360 бюджэтных месцаў, 180 з іх аддадуць мэтавікам.

Нагадаем, мэтавікі - гэта абітурыенты, якія паступаюць па асобным конкурсе. Часта іх прахадны бал ніжэйшы, чым у бюджэтнікаў. Пасля атрымання дыплома такіх выпускнікоў чакае пяць гадоў адпрацоўкі. Для тых, хто проста вучыўся на бюджэце, яна складае два гады.