Як прапагандысты «селі ў лужыну» з аповедамі пра інфляцыю на Захадзе

Здаецца, лукашэнкаўскія СМІ забыліся пра рост коштаў у Беларусі.

Беларускія дзяржаўныя медыі заклапоціліся інфляцыяй у еўрапейскіх краінах. Практычна кожны дзень там з'яўляецца інфармацыя аб рэкордным росце коштаў у гэтым рэгіёне. Але ў той жа час пра беларускую інфляцыю пішуць мінімальна, а ў тэлеграм-каналах дзяржаўных СМІ пра яе як быццам забыліся. А тыя нямногія паведамленні пра кошты ў Беларусі, якія ўсё ж з'яўляюцца ў гэтых выданнях, не заўсёды адлюстроўваюць рэальную сітуацыю спраў. Глядзіце самі, піша zerkalo.io.

Што ў дзяржаўных медыя гавораць аб інфляцыі ў іншых краінах

Журналісты паглядзелі тэлеграм-каналы «Агентства телевизионных новостей» і «Белты». З пачатку месяца ў першым з іх аб праблемах з коштамі ў краінах Еўропы і Амерыкі пісалі больш за 10 разоў, другое медыя нагадвала аб гэтай праблеме ў тых жа рэгіёнах больш за 30 разоў.

Напрыклад, у «АТН» заклапочаныя тым, што гадавая інфляцыя ў Вялікай Брытаніі ў красавіку дасягнула 40-гадовага максімуму - 9%. Аб рэкордзе за такі ж перыяд там пісалі пра Кіпр, дзе яна перавысіла 8,5%. Таксама паведамлялі аб тым, што ў Эстоніі ў красавіку гэты паказчык быў 19%, у Літве - 16,6%, а ў Латвіі - 13,2%.

У Даніі спажывецкія кошты, паводле інфармацыі тэлеграм-канала, выраслі на 5,4%. У Аўстрыі, паводле іх жа звестак, інфляцыя была самай высокай з кастрычніка 1981 года - 7,2%.

«Белта» больш за ўсё заклапочаная ростам коштаў у Польшчы. У гэтай краіне, піша інфармагенцтва, спажывецкія кошты выраслі на 12,4% у параўнанні з тым жа месяцам мінулага года. У выданні паведамлялі аб рэкорднай інфляцыі за 30 гадоў у Швэцыі (6,4%) і за 28 гадоў у Грэцыі (10,2%).

«Інфляцыя ў Францыі ў красавіку наблізілася да паказчыкаў сярэдзіны 1980-х гадоў. Новы ўсплёск інфляцыі стаў вынікам паскарэння росту коштаў паслуг (3%), прадуктаў харчавання (3,8%)», - пішуць аўтары інфармагенцтва. А ў Нямеччыне кошты прадуктаў прыблізна выраслі на 8,6%.

Як ідуць справы з цэнамі ў свеце

Агулам нельга сказаць, што гэтыя дзяржвыданні скажаюць інфармацыю аб інфляцыі ў заходніх краінах.

Кошты сапраўды растуць ва ўсім свеце і часам б'юць шматгадовыя рэкорды. Паскарэнне коштаў пачалося яшчэ летась, калі эканомікі краін сталі аднаўляцца пасля пандэміі: людзі пачалі больш марнаваць, у тым ліку тыя сродкі, якія ўлады пускалі ў эканоміку для падтрымання насельніцтва і бізнэсу падчас локдаўнаў, а кампаніі вярнуліся да актыўнасці. Але галоўная прычына сур'ёзнага росту коштаў сёлета - гэта ваенная агрэсія Расеі супраць Украіны.

Па-першае, гэтыя краіны адыгрываюць важную ролю ў забеспячэнні харчаваннем сусветнай супольнасці. А праз вайну і санкцыі з'явіліся не толькі праблемы з пастаўкамі, але ёсць пытанні аб узроўні будучага ўраджаю, напрыклад, пшаніцы ці сланечніку. У выніку кошты прадуктаў харчавання ў іншых краінах павялічваюцца. Па-другое, у выніку санкцый, закрыцця межаў і ўцёкаў бізнэсу з краін-агрэсараў ускладняюцца, а значыць, і даражэе лагістыка. Гэта таксама адбіваецца на канчатковым кошце, які людзі бачаць у крамах. Тут жа можна ўспомніць пра падаражанне энэрганосьбітаў, што таксама адбіваецца на кошце тавараў.

Пра што маўчаць дзяржаўныя медыі і чыноўнікі

Як бачна, дзяржаўныя СМІ часта сталі гаварыць аб рэкорднай інфляцыі ў іншых краінах, часам выдзяляючы, што Беларусь на гэтым фоне выглядае не так дрэнна. Напрыклад, аб рэкордным росце цэн у Еўропе ў мінулым месяцы ўспамінаў прэм'ер-міністр Раман Галоўчанка, падкрэсліўшы, што «на гэтым фоне мы выглядаем вельмі прыстойна».

Гэта праўда, рост коштаў у Беларусі сёлета не ўстанавіў 40-гадовага рэкорду, зрэшты, як і карацейшага, напрыклад, дзясяцігадовага. Але прычына таму не столькі ўзровень інфляцыі цяпер, колькі два наймацнейшыя скачкі ў гэтым паказчыку ў мінулым, перавысіць якія было б складана і, галоўнае, вельмі балюча. У 2011 годзе, напрыклад, інфляцыя ў Беларусі склала 108,7%, а ў 2000-м - 107,5%. Вось на іх фоне цяперашні індэкс спажывецкіх коштаў 16,8% сапраўды выглядае «вельмі прыстойна».

Калі паглядзець на статыстыку, то ў 2017-2019 гадах у Беларусі была самая нізкая інфляцыя за ўвесь час. Але гэта было, хутчэй, выключэнне з правіла, звычайна яна была двухзначнай. Менавіта таму пабіць рэкорд ва ўзроўні інфляцыі за 10, 20 ці 30 гадоў у нашай краіне было б складана. Але, як паказвае практыка тых жа 2000 і 2011 гадоў, гэта не з галіны немагчымага.

11 траўня «Белта» ў Telegram паведаміла, што ў красавіку інфляцыя склала 1,6%. Пры гэтым інфармагенцтва не ўдакладняе ў допісе, што гэта месячная інфляцыя. Гэта значыць, на столькі цэны выраслі ў красавіку ў параўнанні з сакавіком. А гадавая інфляцыя, па якой можна параўноўваць Беларусь з іншымі краінамі, сітуацыяй у якіх заклапацілася прапаганда, куды больш высокая. Паводле інфармацыі Белстата, за красавік яна склала 16,8%.

Гэты паказчык з таго часу ў сваім тэлеграм-канале інфармагенцтва не публікавала. На сайце ў той дзень навіну таксама пакінулі без яго ўказання. Толькі праз некалькі дзён аб ім згадалі у кантэксце каментара МАРГ аб росце коштаў.

Калі параўнаць гадавую інфляцыю ў Беларусі з тымі краінамі, пра рост коштаў у якіх пісалі ў дзяржаўных СМІ, то нашая краіна выглядае не вельмі прывабна.