Ціханоўская - Захаду: Голад або правы чалавека - фальшывая дылема Лукашэнкі
42- 20.05.2022, 18:58
- 16,566
Летась рэжым выкарыстаў міграцыйны крызіс.
Святлана Ціханоўская звярнулася да краін Захаду наконт з'яўлення інфармацыі, што неўзабаве могуць быць знятыя санкцыі з «Беларуськалія», каб развязаць сусветныя харчовыя праблемы.
Ціханоўская адзначае:
«Летась рэжым выкарыстаў міграцыйны крызіс - а цяпер гэтак жа выкарыстоўвае ў сваіх мэтах і харчовы крызіс.
Лукашэнка стварае фальшывыя дылемы: або голад, або правы чалавека - і прапануе Захаду выбіраць. Такая ўмова з ім - шкодная і амаральная. Засланяючыся турботамі аб голадзе ў свеце, ён спрабуе ўцячы ад адказнасці за тэрор і суўдзел у вайне.
Давайце не забывацца, за што ўводзіліся санкцыі супраць беларускага калію: за рэпрэсіі супраць працоўных і грамадзянскай супольнасці, выкарыстанне мігрантаў у якасці біялагічнай зброі, захоп самалёта, дапамогу Пуціну ў вайне.
Калій - крытычна важны рэсурс для выжывання рэжыму. Гэта лёгкія грошы, якія ідуць не на карысць беларусам - а супраць іх, марнуюцца на ўтрыманне процьмы карнікаў, спецыяльных службаў, вайсковай інфраструктуры і вядзенне вайны.
Таму вярнуць рэжыму магчымасць зарабляць на калійных угнаеннях - гэта даць яму грошы на знішчэнне беларусаў і ўкраінцаў.
А калі мы сапраўды хочам супрацьстаяць вайне і пагрозам харчовай бяспекі, мы маем зліквідаваць іх крыніцы: дыктатарскія рэжымы і ўсе сістэмы, якія замахнуліся на галоўную вартасць у свеце - жыццё чалавека».