Украіна падрыхтавала праекты для пачатку Міжнароднага трыбунала над РФ
4- 20.05.2022, 19:45
- 3,302
42 дзяржавы падтрымліваюць Украіну ў Міжнародным Судзе ААН.
Украіна ўжо падрыхтавала праекты для пачатку дзейнасці спецыяльнага міжнароднага трыбунала над Расеяй. Пра гэта паведаміў агент Украіны ў Міжнародным судзе ААН Антон Карыневіч.
"Украінскія юрысты падрыхтавалі ўжо адпаведныя праекты для абмеркавання з міжнароднымі партнёрамі, каб як мага хутчэй распачаць дзейнасць гэтага спецыяльнага міжнароднага трыбунала для пакарання Расеі", - расказаў Карыневіч.
Ён падкрэсліў: вельмі важна, што 42 дзяржавы падтрымліваюць Украіну ў Міжнародным Судзе ААН для стварэння спецыяльнага міжнароднага трыбунала для пакарання Расеі. Эксперт падкрэсліў, што ў дадатак да тых судовых органаў, якія мы маем, Украіне вельмі патрэбна менавіта такая самавітая судовая міжнародная падтрымка, а таксама важна мець партфоліё аб невыкананні Расеяй выракаў міжнародных судоў.
"Ініцыятыва стварэння гэтага спецыяльнага трыбунала - гэта адна з ключавых задач, якая стаіць перад украінскімі юрыстамі", - падкрэсліў Карыневіч.
Паводле ягоных слоў, на сёння Украіна ўжо сабрала самавітую палітычную падтрымку. Гэта і дзве рэзалюцыі ПАРЕ, і рэзалюцыя парламента Літвы, і рэзалюцыя Еўрапейскага парламента.
Карыневіч нагадаў, што вельмі важныя расследаванні праводзіць Міжнародны крымінальны суд, які можа выдаваць пастановы на арышт найвышэйшых службовых асоб РФ пры прызнанні злачынстваў генацыду супраць украінцаў.