Украінская дзяўчына выкрала ў акупантаў бензавоз з 700 літрамі паліва

Цікавая гісторыя адбылася ў вёсцы Дымер на Кіеўшчыне.

У Крамлі меркавалі, што ўкраінцы будуць радасна сустракаць расейскую армію пасля ўварвання. Атрымалася, што цывільнае насельніцтва чыніць немалы супраціў, што і прывяло да значных стратаў акупантаў.

Адна з такіх гісторый адбылася ў вёсцы Дымер Кіеўскай вобласці. Яна была пад расейскай акупацыяй, калі вораг зайшоў на тэрыторыю Украіны з Беларусі, паведамляе "Настоящее время".

Там таксама былі баі. І аднойчы Святлана Каставецкая знайшла на трасе падбіты расейскі грузавік, які выкарыстоўваўся як бензавоз. У машыны былі прастрэленыя дзверы і прабітае пярэдняе кола. Дзяўчына села ў машыну і знайшла ключ. Калі яна завяла бензавоз, ён аказаўся спраўным і паехаў. Так што з дарогі дзяўчына збочыла ў поле, пакінуўшы яго там. Па полі сама баялася ехаць, таму звярнулася па дапамогу да свайго суседа Валянціна Грышчанкі.

Ужо мужчына знайшоў месца, дзе можна было схаваць бензавоз у лесе так, каб яго не знайшлі расейскія акупанты. Высветлілася, што ў яго яшчэ шмат дызелю. Спачатку Валянцін Грышчанка хацеў спаліць яго на месцы, але Святлана Каставецкая ўгаварыла яго пачакаць. Пасля яны пастанавілі гэты дызель перадаць тым, хто ў гэтым меў большую патрэбу – мясцовай лякарні.

У час акупацыі пасёлка былі праблемы з электразабеспячэннем. Таму лякарня працавала на дызельных генератарах. Але і яго было няшмат. Так што дапамога стала своечасовай. Бо ў шпіталі знаходзілася шмат параненых людзей праз баявыя дзеянні.

"Сабе пакінуць? Прыйдуць, застрэляць, спаляць. А так на супольнасць пайшло", – расказаў пра свой учынак Валянцін Грышчанка.

Увогуле лякарні дасталася 700 літраў дызпаліва. У медустанове прызнаюцца, што гэтага хапіла на 7–8 дзён працы.

Валянцін Грышчанка кажа, што магло быць і больш, але мясцовае насельніцтва, калі даведалася пра схаваны бензавоз у лесе, таксама злівала сабе дызель. У першыя дні ад разрабавання выратавала шыльдачка "замінавана", пакінутая на машыне.

Калі расейскія акупанты адступілі, бензавоз перадалі на патрэбы ўкраінскай арміі. Пасля рамонту ён цяпер у 72-й асобнай механізаванай брыгадзе імя Чорных Запарожцаў.

Трэба дадаць, што ў бензавозе знайшлі і расейскую ваенную форму. На ёй імя Андрушчын В.У. Верагодна, гаворка ідзе пра расейскага вайскоўца Уладзіслава Андрушчына, які служыць у 155 брыгадзе расейскай марской пяхоты. Што з ім адбылося – невядома.