19 жнiўня 2022, Пятніца, 2:05
Сім сім, Хартыя 97!
Рубрыкі

Стала вядома, на колькі падаражэе камуналка для менчукоў праз «новаўвядзенне» ўладаў

13
Стала вядома, на колькі падаражэе камуналка для менчукоў праз «новаўвядзенне» ўладаў

Разлік зроблены на прыкладзе дома № 9 па вуліцы Тышкевічаў у Менску.

Нядаўна СМІ расказалі, што ў Беларусі думаюць уключыць аплату за відэаназіранне ў камунальныя паслугі. Учора прадстаўнікі "Белтэлекаму" агучылі, колькі можа каштаваць такая паслуга. Прадпрыемства гатовае за свой кошт абсталяваць шматпавярховыя дамы ў Менску 100 тысячамі камераў відэаназірання. Устаноўка абсталявання для жыхароў будзе бясплатнай, а вось за яго эксплуатацыю давядзецца плаціць штомесяц, піша агенцтва "Менск-Навіны".

Пра тое, як будзе функцыянаваць сістэма, прадстаўнік "Менскай гарадской тэлефоннай сеткі" РУП "Белтэлекам" Віктар Канюшык расказаў на прыкладзе дома № 9 па вуліцы Тышкевічаў у Менску.

Такім чынам, у гэтай 6-пад'езнай шматпавярхоўцы кругласутачна працуюць 33 камеры ад "Белтэлекама". Імі абсталяваныя ўваходы ў пад'езды, пляцоўкі першых паверхаў, ліфты, фасады, уваходы тэхпадполля і выхады на дах. У цэлым базавыя патрэбы такога дома (ахоп перыметру двара, дзіцячых пляцовак, уваходаў у пад'езды) складаюць 15 камераў.

"У Менску 6400 шматкватэрных жылых дамоў, з якіх відэаназіраннем абсталявана блізу 1800 будынкаў. Мы падлічылі, што для аснашчэння ўсяго шматкватэрнага жылфонду сістэмамі відэаназірання спатрэбіцца 100 тысячаў камераў. Мы гатовыя ўсталяваць іх і іншае абсталяванне, неабходнае для працы сістэмы, за свой кошт", – адзначыў кіраўнік групы працы з ключавымі кліентамі філіяла "Менская гарадская тэлефонная сетка" РУП "Белтэлекам" Віктар Канюшык.

Жыхарам трэба будзе толькі ўносіць абаненцкую плату паводле тарыфу 2,3 рублі з кватэры на месяц. Доступ да відэа з камераў у рэжыме анлайн і да запісаў, якія будуць захоўвацца на сэрверы не менш за 30 дзён, будзе ў ЖКГ. Жыхары змогуць бясплатна атрымаць лагін і пароль для прагляду гэтых відэа ў ЖКГ ці "Белтэлекаме" на заяўку. Больш за тое, кампанія ўжо прапануе аналітыку запісаў з камераў.

На ўстаноўку сістэмаў ва ўсіх дамах Менска, паводле словаў Канюшыка, спатрэбіцца 2-3 гады. Але рэалізуюць праект толькі ў тым выпадку, калі відэаназіранне стане асноўнай жыллёва-камунальнай паслугай.

У Менгарвыканкаме гавораць, што сістэмамі відэаназірання паступова абсталёўваюцца ўсе значныя аб'екты сталіцы. Таксама іх ужываюць на аб'ектах капрамонту: паводле словаў чыноўнікаў, відэаназіранне дазваляе эканоміць сродкі і павышае прадукцыйнасць працы, паколькі ведаючы пра магчымасць назірання, супрацоўнікі працуюць добрасумленна. "Мяркуем, што ёсць неабходнасць развіваць сістэму відэакантролю і ў жыллі. Гэта дапаможа ў пытаннях бяспекі, будзе стымуляваць падраднікаў працаваць якасна", – растлумачыў намеснік старшыні Менгарвыканкама Аляксандр Дараховіч.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».