«Эканомія ва ўсім, кошты – кашмар»
17- 21.05.2022, 11:16
- 10,354
Беларусы расказалі, на колькі падаражэла іх жыццё.
Выданне Intex-press звярнулася да карыстальнікаў сацыяльных сетак з просьбай расказаць, як змяніліся іх прыбыткі і выдаткі за апошні час. Усе апытаныя адзначылі, што з пачаткам ваенных дзеянняў ва Украіне іх жыццё прыкметна падаражэла, і цяпер многія вымушаныя ўключаць рэжым эканоміі.
«Перастала набываць сокі, перац, чыпсы»
Першае, на што заўважылі сур'ёзны рост коштаў і на чым сталі эканоміць беларусы, гэта прадукты харчавання.
– Такое пачуццё, што ў два разы павялічыліся выдаткі на прадукты! Пры тым, што бярэш усё самае неабходнае. Першым прыходзіць на розум павышэнне коштаў гародніны і садавіны. Яблыкі, памідоры, агуркі, – здаецца, самыя звычайныя прадукты, але ў выніку сумы значныя, – адзначыла гараджанка Людміла. – Я перастала набываць пакетаваныя сокі, перац, чыпсы. Сталі есці менш мяса і прысмакаў.
Пра тое, што праз рост коштаў гародніны давялося практычна ад яе адмовіцца, расказала і жыхарка Баранавічаў Наталля.
– Гародніну амаль не набываем. Тут увогуле не ведаеш, што набыць недарагое паесці, каб хапіла грошай на крэдыт, камуналку і іншыя аплаты, – сказала жанчына.
Многія гараджане адзначылі, што цяпер часцей звяртаюць увагу на акцыі ў крамах і эканомяць на фастфудзе і паходах у кавярні.
– Гатовую прадукцыю набываць сталі радзей. Раней менш на цэннік глядзелі, а цяпер больш пачынаем звяртаць увагу на акцыі, – сказаў наш чытач Дзмітрый.
«Шалёныя кошты памперсаў»
Але і на падаражанне нехарчовых тавараў скардзіліся жыхары Баранавічаў. Асабліва абураліся мамы баранавіцкіх малых наконт рэзкага росту коштаў падгузнікаў.
– Шалёныя кошты памперсаў рэзка. Пра хімію ўвогуле маўчу. Вось як нас любіць і клапоціцца пра нас наша дзяржава: заробкі мізэрныя, дапамогі і пенсіі на капейкі паднялі, а падаражэла ўсё без выключэння, і заўважна. Эканомія ва ўсім, кошты – кашмар! – абуралася Валерыя.
Хтосьці цешыўся, што паспеў прывезці бытавую хімію з-за мяжы з запасам і старымі коштамі, хтосьці адзначаў, што перайшоў з імпартнай касметыкі на беларускую і стаў набываць адзенне ў сэканд-хэндах, а хтосьці, наадварот, казаў, што не адмовіўся ад любімых касметычных брэндаў нават нягледзячы на падаражанне.
Некаторыя чытачы казалі, што праз рост коштаў адных тавараў давялося ўразаць выдаткі на іншыя.
– Жонка перастала на фітнэс хадзіць, на ровары цяпер ездзіць. Давялося адмяніць індывідуальныя заняткі гімнастыкай для дачкі. Кошт заняткаў не змяніўся, проста на іншыя патрэбы грошы сыходзяць, – расказаў Дзмітрый.
«Кошты растуць, а заробкі на месцы»
Эканоміць гараджанаў прымушаюць не толькі кошты, якія ідуць на ўзлёт, але і прыбыткі, што стаяць на месцы, а то і зніжаюцца.
У мужа Людмілы, які працуе на замежную фірму праграмістам, напрыклад, пачаліся праблемы з выплатай заробку.
– Праз вайну ва Украіне мужу пачалі затрымліваць заробак: санкцыі, заказчыкі без грошай і іншае, – расказвае яна.
А ў кіроўцы-міжнародніка Дзмітрыя, хоць і няма праблемаў з выплатамі заробку, знізіўся прыбытак.
– Заробак мне плацяць у еўрах. Ён застаўся на даваенным узроўні, але праз курс менш атрымліваецца, – кажа ён.
Праз падзенне ўзроўню прыбыткаў і рост коштаў некаторыя гараджане не проста сталі эканоміць, але і думаць пра змену працы і нават месцы жыхарства.
– Кошты тавараў растуць, а заробкі на месцы ці яшчэ менш выплачваюць. Мы вось з мужам падумваем ехаць у Менск. Там, вядома, заробкі таксама не вельмі, але заўсёды ёсць падпрацоўкі, – рэзюмуе Наталля.