Дзярждэпартамэнт ЗША: Мы прадоўжым рабіць усё, каб пазбавіць рэжым Лукашэнкі вайсковых і фінансавых магчымасцяў

У ЗША пракаментавалі магчымае скасаванне санкцый супраць «Беларуськалія».

Прэс-сакратар Дзярждэпартамента Нэд Прайс падчас брыфінгу пракаментаваў публікацыю ў The Wall Street Journal пра тое, што ЗША разглядаюць магчымасць прыпынення санкцый у дачыненні да беларускіх калійных угнаенняў у абмен на транзіт украінскага збожжа ў Клайпеду.

Ён адзначыў, што за апошнія дні ў ААН былі абмеркаваныя многія аспекты харчовай бяспекі, звязаныя з нападам Расеі на Украіну. Паводле словаў Прайса, Масква імкнецца ўсімі спосабамі зняць з сябе адказнасць за праблемы з пастаўкамі збожжа і перакласці яе на ініцыятараў санкцый.

«Урад Расеі, выкарыстоўваючы ў гэтым выпадку прадукты харчавання як зброю, блакуючы экспарт – вываз прадуктаў харчавання з партоў Украіны, Крэмль імкнуўся зняць з сябе адказнасць за свае дзеянні, абвінавачваючы санкцыі ў збоях у сусветным гандлі харчаваннем. Гэта загадзя лжыва. Нашы санкцыі ў дачыненні да Расеі спецыяльна выключаюць прадукты харчавання і ўгнаенні», – сказаў Прайс.

Ён адзначыў, што для развязання праблемаў у сферы харчовай бяспекі Крэмль у першую чаргу павінен спыніць сваю агрэсію супраць Украіны, што дасць магчымасць украінскім аграрыям спакойна вырасціць ураджай, а марскім судам дастаўляць украінскае зерне спажыўцам. Прэс-сакратар Дзярждэпартамента таксама выказаў падтрымку намаганням генеральнага сакратара ААН, накіраваным на развязанне гэтых праблемаў.

«Мы падтрымліваем яго намаганні, накіраваныя на тое, каб пераканаць Расею спыніць неправакаваную, неапраўданую вайну, і яго намаганні, накіраваныя на тое, каб Украіна магла бесперашкодна экспартаваць сваю сельскагаспадарчую прадукцыю, каб зноў дапамагчы накарміць свет», – сказаў ён.

Гаворачы пра Беларусь, Прайс адзначыў, што санкцыі ў дачыненні да «Беларуськалія» і «БКК» былі ўведзеныя ў 2020 годзе ў адказ на дзеянні беларускіх уладаў супраць мірных пратэстаў і парушэнні асноўных правоў чалавека.

«Менавіта рэжым Лукашэнкі выкарыстоўвае гэтыя дзяржаўныя прадпрыемствы для ўзбагачэння і падтрымання свайго рэпрэсіўнага рэжыму. І да таго часу, пакуль рэжым не спыніць падтрымку несправакаванай агрэсіі Расеі супраць Украіны, мы прадоўжым прадпрымаць усе неабходныя дзеянні для падрыву ягоных ваенных і фінансавых магчымасцяў праз мэтанакіраваныя санкцыі, уключаючы дзеянні, прадпрынятыя супраць Расеі», – сказаў Прайс.

Ён падкрэсліў, што санкцыі застануцца ключавымі інструментамі ў намаганнях для развязання праблемаў глабальнай бяспекі, парушэнняў правоў чалавека ў Беларусі і ў іншых галінах, якія выклікаюць занепакоенасць ЗША.