Байдэн падпісаў закон аб выдзяленні Украіне $40 мільярдаў
2- 21.05.2022, 14:03
- 3,060
Што ўключае ў сябе новы пакет дапамогі?
Прэзідэнт ЗША Джо Байдэн 21 траўня падпісаў закон, які прадугледжвае выдзяленне амаль $40 млрд на дапамогу Украіне. Пра гэта паведаміла прэс-служба Белага дома.
21 траўня прэзідэнт ЗША ўвёў у дзеянне «Закон аб дадатковых асігнаваннях Украіне на 2022 год», які прадугледжвае дадатковыя надзвычайныя асігнаванні на 2022 фінансавы год федэральным агенцтвам для рэагавання на сітуацыю ва Украіне і надання дапамогі ёй», - гаворыцца ў паведамленні.
Амерыканскі лідар падпісаў дакумент падчас візіту ў Рэспубліку Карэя.
Як адзначаў «Голас Амерыкі», новы пакет дапамогі ўключае:
больш за $4 млрд на гуманітарную дапамогу Украіне і іншым краінам, якія пацярпелі ад наступстваў вайны;
$350 млн для надання дапамогі бежанцам;
амаль $9 млрд, якія будуць накіраваныя ў фонд эканамічнай падтрымкі Украіны і іншых краін, якія ўскосна закрануў канфлікт;
амаль $15 млрд, з якіх амаль $6 млрд пойдуць на ўзмацненне бяспекі Украіны, а $8, 7 млрд - на папаўненне запасаў амерыканскай вайсковай тэхнікі, перададзенай Украіне;
замежнае вайсковае фінансаванне ў суме $4 млрд для падтрымкі Украіны і іншых краін, якія пацярпелі ад крызісу;
$100 млн для праграм нераспаўсюджвання ядзернай зброі, барацьбы з тэрарызмам і размінавання тэрыторый;
$200 млн на дыпламатычныя праграмы Дзярждэпа ЗША для рэагавання на сітуацыю ва Украіне і краінах, закранутых канфліктам;
$110 млн на гарантаванне бяспекі, будаўніцтва і тэхнічнае абслугоўванне пасольства ЗША ва Украіне.
Акрамя гэтага, законапраект прадугледжвае выдзяленне да $11 млрд у рамках прэзідэнцкіх паўнамоцтваў па выбарцы сродкаў. Яны дазваляюць прэзідэнту ЗША санкцыянаваць перадачу тавараў і паслуг без ухвалення Кангрэса ў выпадку надзвычайнай сітуацыі.