Бітва за Данбас: акупанты спрабуюць прарваць абарону УСУ

Ідуць баі.

На Данецкам кірунку вораг спрабуе прарваць абарону нашых войскаў і выйсці на адміністрацыйныя межы Луганскай вобласці.

Пра гэта гаворыцца ў аператыўнай інфармацыі Генеральнага штаба аб расейскім уварванні.

Таксама на Паўночнаданецкім кірунку вораг вёў баявыя дзеянні ля населенага пункта Прудоўкі. Падраздзяленні акупантаў спрабавалі весці наступленне з мэтай захопу населенага пункта Аляксандраўкі, поспеху не мелі.

З мінамётаў і ствольнай артылерыі вораг прадоўжыў абстрэлы пазіцый Сіл абароны ўздоўж лініі судакранання на ўказаным кірунку.

На Бахмуцкім кірунку пры падтрымцы артылерыі акупанты спрабавалі палепшыць тактычнае становішча сваіх падраздзяленняў. Вялі баявыя дзеянні непадалёк ад населеных пунктаў Ташкаўкі, Камышавахі, Трыполля і Васільеўкі.

На Ліманскім кірунку вораг абстраляў населеныя пункты Ліман, Закітнае, Азёрнае і Дубраву. Працягваў агнявое ўздзеянне на пазіцыі падраздзяленняў Сіл абароны.

На Аўдзееўскім, Курахаўскім, Навапаўлаўскім і Запарожскім кірунках фіксуецца зніжэнне інтэнсіўнасці вядзення баявых дзеянняў. Вораг ажыццяўляе перагрупоўку для ўзмацнення асобных кірункаў.

На Паўднёвабужскім кірунку вораг актыўных баявых дзеянняў не праводзіў. Працягвае работы па пабудове другой лініі абароны. Узмацняе артылерыйскую групоўку і нарошчвае сістэму супрацьпаветранай абароны.

На Славянскім кірунку акупанты асноўныя намаганні засяродзілі на стварэнні ўмоў для аднаўлення наступлення. Працягнулі абстрэлы населеных пунктаў па лініі судакранання. На асобных адрэзках спрабавалі правесці выведку боем, панеслі страты і адступілі.

На Харкаўскім кірунку вораг цягам дня актыўных дзеянняў не праводзіў. Узмацніў паліцэйска-адміністрацыйны рэжым на часова захопленых тэрыторыях.

У Чарнаморскай і Азоўскай марской зонах карабельныя групоўкі ворага працягваюць выконваць задачы па ізаляцыі раёнаў баявых дзеянняў і блакавання цывільнага суднаходства.