Створаная база звестак расейскіх камандзіраў, якія ўдзельнічаюць у вайне ва Украіне

У кожнага трэцяга вышэйшага камандзіра войска РФ знойдзеныя пазыкі, у тым ліку па ЖКГ і аліментах.

Расейскае выданне «Проект» склала базу звестак з інфармацыяй аб падраздзяленнях войскаў РФ, якія ўдзельнічаюць у вайне ва Украіне, а таксама аб іх камандзірах. Усяго ў ёй сабраная інфармацыя аб 166 камандзірах і 150 падраздзяленнях, яны прадстаўляюць 53 рэгіёны Расеі, паведамляе zn.ua.

Пошук па базе можна ажыццяўляць па рэгіёне дыслакацыі, накіраванні наступлення, войскам, вайсковай акрузе, а таксама званні камандзіра. Так, «Проекту» вядомая інфармацыя аб 72 генералах і адміралах, 69 палкоўніках і 16 падпалкоўніках. Цікава, што ў многіх з іх знойдзеныя запазычанасці, а таксама роднасныя сувязі ва Украіне. Некаторыя нарадзіліся ў нашай краіне.

Выданне піша, што колькасць расейскага войска складае 900 тысяч чалавек, перад пачаткам поўнамаштабнага ўварвання ва Украіну каля межаў нашай краіны было сканцэнтравана амаль 20% асабовага складу. Маштабы марадзёрства на захопленых расейскімі войскамі тэрыторыях у «Проекте» тлумачаць тым, што ў вайне ўдзельнічаюць выхадцы з самых бедных рэгіёнаў Расеі. Афіцэры-захопнікі атрымліваюць больш за жаўнераў, але нават камандуючыя арміяй і флотам, якія патрапілі ў выбарку, зарабляюць на парадак менш, чым тыя, хто паслаў іх на вайну.

«Сярэдні даход афіцэра, які камандуе наземным войскам, у 2019 годзе быў блізу 270 тысяч рублёў на месяц. Для параўнання, намеснікі міністра абароны РФ Сяргея Шайгу зараблялі (толькі афіцыйна) у той жа перыяд прыблізна 1,2 млн рублёў на месяц, а афіцэры Генштаба, якія непасрэдна кіруюць войскам і флотам Расеі, — прыблізна 300 тысяч», - піша выданне.

У кожнага трэцяга вышэйшага камандзіра арміі з тых, хто ўдзельнічае ў нападзе на Украіну, знойдзеныя пазыкі, у тым ліку па ЖКГ і аліментах. Пяцёра чалавек з выбаркі прыцягваліся да адміністрацыйнай адказнасці, у тым ліку, за нежаданне змагацца з карупцыяй сярод падначаленых, кожны пяты - атрымліваў штрафы ДІБДР, а кожны шосты - не плаціў іх своечасова.

Рэальны баявы досвед ёсць толькі ў 23% з тых, хто патрапіў у выбарку «Проекта».

Паводле звестак Генштаба Мінабароны Украіны на 22 траўня на ўкраінскай зямлі ўжо загінулі амаль 29 050 асабовага складу войска акупантаў. Так, 11 траўня ўкраінская артылерыя знішчыла расейскія пантонныя масты і шчыльна засяроджаныя расейскія войскі і тэхніку вакол іх на рацэ Северскі Данец, што прывяло да гібелі 485 чалавек з 550 чалавек асабовага складу групоўкі.