6 лiпеня 2022, Серада, 3:33
Сім сім, Хартыя 97!
Рубрыкі

У Беларусі прадаюць панскі дом, дзе бывалі Кебіч і Чыгір

4
У Беларусі прадаюць панскі дом, дзе бывалі Кебіч і Чыгір
ФОТА З САЙТА PLANETABELARUS.BY

Пачатковы кошт лота – прыкладна $64 500.

Былы панскі дом, якому больш за 100 гадоў, прадаюць у Ганцавіцкім раёне. У 90-я гады ХХ стагоддзя пры сядзібе ў Агарэвічах праводзілі конныя спаборніцтвы, не раз сюды прыязджалі і вядомыя чыноўнікі. Цяпер аб'ект выстаўлены на таргі, яго можна выкарыстоўваць нават пад жыллё, паведамляе Дзяржкамітэт маёмасці.

Гэты сядзібны дом пабудавалі ў 1911 годзе, належаў ён памешчыкам Свяржынскім. Цяпер прапісаны ў аграгарадку Агарэвічах Ганцавіцкага раёна.

Пачатковы кошт лота з гісторыяй – 159 тысяч рублёў, гэта прыкладна $64 500. Будынак аднапавярховы, з калонамі. Плошча - 324 «квадраты».

Апроч самога сядзібнага дома, ёсць ацяпляльная прыбудова, брыгадны дом, танцпляцоўка з мостам, сказана ў паведамленні аб таргах.

Пры пабудовах - зямля на 2,4 гектара. Куплю можна выкарыстоўваць пад прамысловую вытворчасць, грамадскае харчаванне, зрабіць там гандлёвы аб'ект, а таксама проста для жыцця і вядзення падсобнай гаспадаркі.

ФОТА З САЙТА radzima.org

Але важны момант: пакупніку давядзецца падпісаць ахоўнае абавязацельства, бо гэта гісторыка-культурная каштоўнасць.

Прадавец - аддзел ідэалагічнай працы Ганцавіцкага райвыканкама. Адзначаецца, што ёсць усе патрэбныя сеткі: ацяпленне, вада, электрычнасць, каналізацыя, тэлефон.

Электронныя таргі пройдуць 31 траўня, заявы прымаюць да сярэдзіны дня 26 траўня.

Яшчэ нядаўна ў сядзібе размяшчалася сталовая работнікаў буйнога сельгаспрадпрыемства «Беразавец». Аднак з часам гаспадарцы стала нявыгадна ўтрымліваць аб'ект, расказвала мясцоваму выданню «Ганцавіцкі час» былая захавальніца панскага дома Галіна Куліноўская.

ФОТА З САЙТА PLANETABELARUS.BY

Спачатку сядзіба належала роду Свяржынскіх, перабудоўвалі яе за Апацкімі. У 1939 годзе дом спустошылі, гаспадыню маёнтка саслалі ў Сібір.

Панскі дом доўга стаяў закінуты, аднак яго адрамантавалі ў пачатку 1990-х. Унутры нават абсталявалі невялікі гатэль. Увосень 1994-га ў Агарэвічах прымалі конныя спаборніцтвы, якія праходзілі пры панскім доме.

З успамінаў Галіны Кулікоўскай, у розны час сядзібу наведвалі чыноўнікі з урада. Напрыклад, старшыня Саўміна Вячаслаў Кебіч, прэм'ер-міністры Міхаіл Мясніковіч і Міхаіл Чыгір.

У нашы дні з Вялікай Брытаніі і Швайцарыі прыязджалі ў Агарэвічы і нашчадкі былых уладальнікаў сядзібы.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».