Экс-дырэктара Слуцкага мясакамбіната прысудзілі да чатырох гадоў калоніі

Таксама ён павінен будзе заплаціць штраф.

Суд Жлобінскага раёна прысудзіў да чатырох гадоў пазбаўлення волі былога дырэктара Слуцкага мясакамбіната Мікалая Вярбіцкага. Яго абвінавацілі ў атрыманні хабару ў суме 6500 даляраў (ч.2 арт.430 КК), паведамілі ў прэс-службе суда.

Згодна з матэрыяламі справы, былы кіраўнік мясакамбіната атрымаў грошы ў некалькі этапаў (з 6 красавіка 2021 года да 2 кастрычніка 2021 года). Яму плацілі за забеспячэнне ў рамках укладзеных дамоваў рэгулярных, своечасовых, у неабходных трэцяй асобе аб'ёмах адгрузак мясной прадукцыі ААТ «Слуцкі мясакамбінат» на адрас ТАА «BRAVO MEAT» і ТАА «РЭЗЕРВ BRAVO».

Акрамя таго, экс-кіраўнік павінен будзе заплаціць штраф у суме 500 базавых адзінак, ён таксама пазбаўлены на пяць гадоў права займаць пасады, звязаныя з выкананнем арганізацыйна-распарадчых абавязкаў.