«За капейкі вазіць не будзем»: У Жодзіне страйкуюць таксісты

Супрацоўнікі «Яндэкс Go» не выходзяць на працу.

У Жодзіне сёння некаторыя таксісты "Яндэкс Go" зноў не выйшлі на працу. Яны расказалі zerkalo.io, што агрэгатар "абяцаў палепшыць умовы працы, а фактычна нічога не змянілася". Праз тое, што змянілася аплата працы таксістаў, у пачатку траўня яны ўжо не выходзілі ў некаторыя дні на працу. Такая сітуацыя была ў Жодзіне, Івацэвічах, Бабруйску, Баранавічах.

Што адбылося

У канцы красавіка "Яндэкс Go" паведамляў пра аптымізацыю тарыфаў у некаторых гарадах Беларусі, "каб часткова кампенсаваць змяненне коштаў паліва і абслугоўванне аўтамабіляў і каб кошт паездак заставаўся даступным для карыстальнікаў".

Пры гэтым сэрвіс "Яндэкс Go" змяніў гарантаваную штодзённую аплату кіроўцам. У некаторых гарадах яе знізілі, а недзе (напрыклад, у Жодзіне) і зусім скасавалі цалкам. Таксама агрэгатар панізіў тарыфы для пасажыраў, што адбілася на заробку кіроўцаў – ён стаў меншы. Таксісты скардзяцца, што цяпер пры поўнай працоўнай змене яны не могуць нармальна зарабіць, а кошты паліва і абслугоўвання аўто за апошнія некалькі месяцаў увесь час растуць.

Кампанія "Яндэкс Go" заяўляла, што пры новых тарыфах прыбыткі кіроўцаў вырастуць на пяць адсоткаў.

"За гэтыя капейкі вазіць не будзем". Што кажуць кіроўцы з Жодзіна

Перавознікі з Жодзіна паведамілі, што сёння некаторыя з іх зноў не выйшлі на працу. Прычына гэтага ранейшая – незадаволенасць аплатай працы. Высвятляецца, пасля пратэстаў "Яндэкс Go" вярнуў для іх дзённую гарантаваную аплату памерам 140 рублёў. Але каб яе атрымаць, трэба выканаць 40 паездак (раней было 35 паездак), а тарыф для пасажыраў пакінулі ранейшым.

– Паездкі для людзей выходзяць 1,2–1,4 рубля. А бензін даражэе, амартызацыю трэба плаціць. Тэлефануем і пішам пасажырам, што за гэтыя капейкі вазіць не будзем. Людзі абураюцца, таму што нехта гатовы плаціць і 3,5 рубля, як у звычайных службах таксі, але там машыну не выклікаць, – расказалі перавознікі.

Кіроўцы хочуць, каб "Яндэкс Go" прыслухаўся да іх просьбаў і выраўнаваў паездку па горадзе з іншымі службамі таксі Жодзіна, а таксама вярнуў платныя падачы аўтамабіля.

– Вельмі шмат дасведчаных кіроўцаў сышлі, прыходзяць моладзь падпрацоўваць, якая працуе пад чужымі акаўнтамі, яны ўвогуле не ведаюць спецыфікі працы ў таксі, гатовыя за 1,2 рубля працаваць і забіваць машыны, – абураюцца таксісты "Яндэкс Go".