Улады нечакана наважылі ўзяцца за рамонт стратэгічнай дарогі ля ўкраінскай мяжы

Пасля пачатку расейскага ўварвання ва Украіну яна выкарыстоўвалася для стварэння вайсковай інфраструктуры.

На сайце дзяржзакупак выявіўся тэндэр, паводле якога плануецца адрамантаваць 30-кіламетровую дарогу, размешчаную на закрытай тэрыторыі Палескага радыяцыйна-экалагічнага запаведніка. Пасля пачатку расейскага ўварвання ва Украіну яна выкарыстоўвалася для стварэння вайсковай інфраструктуры, піша гомельскае выданне «Флагшток».

Двухпалосная асфальтавая дарога, якую будуць рамантаваць, ідзе ад вёскі Бабчын каля ўезду ў зону адчужэння да адселенай вёскі Краснаселле каля ракі Прыпяць, за 8 кіламетраў ад мяжы з Украінай.

Рамонт пакрыцця патрабуецца выканаць на пляцы 4115 квадратных метраў, ён пацягне арыентыровачна на 118 843 рублёў, сродкі возьмуць з рэспубліканскага бюджэту. Завяршыць рамонтныя работы неабходна ў сціслыя тэрміны - да 1 ліпеня 2022 года дарога павінна быць гатова. Заказчык работ - Палескі дзяржаўны радыяцыйна-экалагічны запаведнік.

З пачатку расейскага ўварвання ва Украіну ў беларускай частцы Чарнобыльскай зоны размяшчаўся шэраг вайсковых аб'ектаў РФ. У вёсцы Рудакоў, за 4 кіламетры ад Бабчына, быў створаны вайсковы лагер. На Прыпяці за 3,5 кіламетры ад Краснаселля расейскія вайскоўцы ўзвялі пантонную пераправу, на другім беразе ў тым жа раёне падчас расейскага наступу канцэнтравалася вайсковая тэхніка.