У «дармаедскі» дэкрэт увялі навацыі

Плаціць за ЖКП паводле поўных тарыфаў будуць амаль усе, хто з'ехаў за мяжу.

Урад увёў істотныя змены ў «дармаедскі» дэкрэт. Так, тыя, хто працуе ці вучыцца за мяжой, цяпер будуць павінны плаціць за газазабеспячэнне, ацяпленне і гарачую ваду паводле эканамічна абгрунтаваных тарыфаў. Размова пра тых, хто мае ва ўласнасці жыллё. Гэтую інфармацыю журналісту zerkalo.io як фізічнай асобе пацвердзілі ў трох «дармаедскіх» камісіях.

Журналіст як фізічная асоба затэлефанаваў у тры «дармаедскія» камісіі ў Менску. Афіцыйна яны называюцца стала дзейнымі камісіямі для каардынацыі спрыяння занятасці насельніцтва. Ва ўсіх трох выпадках нам пацвердзілі, што ў сакавіку ўвялі істотныя навацыі для тых, хто з'ехаў за мяжу. Гэта прадугледжана пастановай урада № 166 ад 25 сакавіка.

Тым, хто працуе або вучыцца за мяжой, давядзецца плаціць за ЖКП паводле поўных тарыфаў (але гэта тычыцца не ўсіх краін)

Адна з асноўных навацый, якую ўвялі ў сакавіку: той, хто працуе або вучыцца за мяжой, не зможа цяпер падаваць дакументы аб гэтым і, адпаведна, вызваляцца ад аплаты за газазабеспячэнне, ацяпленне і гарачую ваду паводле эканамічна абгрунтаваных тарыфаў. З сакавіка праца або навучанне за мяжой не лічацца падставамі, каб не аплачваць «дармаедскі» рахунак.

Але тут ёсць вынятак, гэтая навацыя не датычыцца тых, хто працуе або вучыцца ў краінах ЕАЭС — Расеі, Казахстане, Арменіі, Кіргізіі. Калі пацвердзіць сваю занятасць або навуку ў гэтых дзяржавах, то «дармаедскі» рахунак не пагражае. «Цяпер мы прымаем дакументы толькі ад тых беларусаў, якія з'ехалі ў прыязныя краіны - Расею, Казахстан, Арменію і Кіргізію. Ад іх мы прымаем дакументы аб тым, што яны знаходзяцца там на навучанні або працы. З усіх астатніх краін мы не прымаем дакументы такога характару, што чалавек працуе альбо вучыцца», — удакладнілі ў адной з камісій.

Нагадаем, даўней для тых, хто працуе за мяжой, можна было падаць пацвярджальны дакумент. Да прыкладу, копію працоўнай умовы - кантракту. Беларусам, якія вучацца на дзённай форме ў іншых краінах, можна было ўзяць даведку з установы адукацыі. Гэта вызваляла ад платы за газазабеспячэнне, ацяпленне і гарачую ваду паводле эканамічна абгрунтаваных тарыфаў.

Як разлічваюць аплату за ЖКП, калі ў кватэры жыве адзін дармаед, а астатнія занятыя ў эканоміцы

Да прыкладу, калі ў кватэры жыве сям'я з некалькіх чалавек і аднаго з іх прызнаюць дармаедам, то спажытыя ЖКП дзеляцца на лік зарэгістраваных у жыллі: прызнаны утрыманцам аплачвае сваю частку поўным тарыфам (пры ўмове, што ён - уласнік жытла), а астатнія, хто не лічыцца ў базе - паводле льготных.

Навацыя для тых, хто застаўся без працы ў Беларусі, але з'ехаў з краіны больш, чым на 30 дзён

Яшчэ адна з навацый — з 1 сакавіка беларусы, якія трапілі ў базу «дармаедаў» і з'ехалі з краіны больш, чым на 30 дзён, аўтаматычна праз месяц пасля ад'езду аплачваюць за газазабеспячэнне, ацяпленне і гарачую ваду паводле эканамічна абгрунтаваных тарыфаў. Вынятак - выезд на аздараўленне і санаторна-курортнае лячэнне.

Для тых, хто не з'язджае з краіны, будзе дзейнічаць ранейшае правіла. Так, тых, хто страціць працу, уключаць у базу не адразу. На пошукі новага месца даецца ад 3 да амаль 6 месяцаў. Чыноўнікі бяруць квартал, у якім чалавек страціў працу, і даюць на працаўладкаванне яшчэ тры месяцы звыш.

Прыклад для навочнасці, як гэта дзейнічае

Работніка звольнілі 2 ліпеня, гэта значыць, на пачатку трэцяга квартала. У такім выпадку наступны квартал (кастрычнік-снежань) яму даецца на працаўладкаванне, яго не будуць уключаць у базу. За люты маюць абнавіць базу ўтрыманцаў (яна стане даступная з 1 сакавіка), таму тым, хто можа апынуцца ў ёй, да 21 студзеня трэба будзе паспець пацвердзіць занятасць. Фактычна выходзіць, што ў гэтага работніка на пошук працы будзе амаль паўгода. Калі яго звольняць 30 верасня, то на працаўладкаванне будзе 3 месяцы.

Аб выездзе за мяжу больш чым на 30 дзён Міністэрству працы паведамляе памежны камітэт

У «дармаедскіх» камісіях расказалі, што па красавіку ўжо склалі спісы тых, хто нідзе не працуе і выехаў за мяжу больш за 30 дзён. Калі гэтыя людзі маюць ва ўласнасці жыллё, будзе плаціць паводле поўных тарыфаў за пэўныя ЖКП.

- Калі чалавек звольніўся пасля 1 сакавіка і з'ехаў, дапусцім, у ЗША больш чым на 30 дзён, то ў Беларусі на месцы рэгістрацыі ён будзе плаціць за газазабеспячэнне, ацяпленне і гарачую ваду паводле эканамічна абгрунтаваных тарыфаў. Пры ўмове, што ён не здае, да прыкладу, у арэнду нерухомасць, - расказалі ў адной з камісій.

Гэта значыць, паводле льготных тарыфаў па-ранейшаму змогуць аплачваць рахунак тыя, хто афіцыйна здае ў арэнду нерухомасць, а таксама зарэгістраваныя як рамеснік або займаецца аграэкатурызмам. Незалежна ад таго, дзе гэты чалавек жыве - у Беларусі або за мяжой.

Адно з асноўных пытанняў у гэтай схеме ў тым, што рабіць тым, хто выехаў за мяжу больш чым на 30 дзён, а потым праз нейкі час вернецца ў Беларусь. У «дармаедскіх» камісіях паведамілі, што пакуль не ведаюць, як гэта будзе дзейнічаць.

У адной з камісій удакладнілі, што памежны камітэт наўрад будзе перадаваць інфармацыю ў Міністэрства працы аб тым, што чалавек, які раней выехаў больш як на 30 дзён, вярнуўся назад. Гэта значыць, мабыць, пасля вяртання трэба будзе звяртацца ў такую камісію і пацвярджаць занятасць у Беларусі, каб плаціць за ЖКП паводле льготных тарыфаў. «Момант з вяртаннем грамадзяніна (у Беларусь —рэдакцыя) і наступным налічэннем яму аплаты за ЖКП пакуль не магу падказаць, міністэрства нам пакуль як след не патлумачыла (міністэрства працы —рэдакцыя). Таму нічога сказаць пакуль не магу з гэтай нагоды», - расказалі ў адной з «дармаедскіх» камісій.