У медыцынскіх ВНУ да 80 адсоткаў бюджэтных месцаў будуць адводзіцца для навучэнцаў з мэтавым накіраваннем

У Беларусі ўжо сёлета пачала дзейнічаць новая норма для тых, хто паступае ў ВНУ.

Цяпер "замаўля" кадры для мэтавай падрыхтоўкі могуць арганізацыі і прадпрыемствы з усіх, а не толькі малых населеных пунктаў. Але ў 2023-м мэтавы набор пашыраць яшчэ больш - павялічаць квоты, асабліва ў медыцынскіх ВНУ. Пра гэта і іншыя будучыя змены для абітурыентаў распавёў у чацвер начальнік галоўнай управы прафесійнай адукацыі Мінадукацыі Сяргей Каспяровіч, паведамляе zerkalo.io.

Так, паводле слоў чыноўніка, на медыцынскіх спецыяльнасцях да 80 адсоткаў бюджэтных месцаў будзе адводзіцца для “мэтавікоў” (пры патрэбе ў заказчыкаў кадраў). На сельгасспецыяльнасцях - да 70%. На астатніх спецыяльнасцях колькасць мэтавых месцаў пры неабходнасці можа дасягаць 60 адсоткаў.

Пры гэтым для паступлення на мэтавае месца з 2023 года трэба будзе падаць не сертыфікаты ЦТ, а толькі атэстат, а таксама здаць унутраны ўступны экзамен па адным з профільных прадметаў спецыяльнасці. Конкурс будзе праходзіць паводле сярэдняга балу атэстата, і сумай з балам за іспыт, расказаў Каспяровіч.

Нагадаем, пры мэтавай падрыхтоўцы абітурыент да паступлення ўкладае дамову з прадпрыемствам, якое фінансуе яго адукацыю. Пасля атрымання дыплома ён павінен адпрацаваць на гэтым прадпрыемстве не менш як пяць гадоў.

З'явяцца і іншыя навінкі для тых, хто паступае ў ВНУ. Акрамя традыцыйных рэспубліканскіх прадметных алімпіяд, юнакі і дзяўчаты змогуць удзельнічаць ва ўніверсітэцкіх алімпіядах для школьнікаў і ў выпадку перамогі паступаць у адпаведную ВНУ без экзаменаў.

Таксама без іспытаў паступаць на пэўныя спецыяльнасці змогуць школьнікі, якія прайшлі праграму навучання ў Нацыянальным дзіцячым тэхнапарку і атрымалі рэкамендацыі наглядальнай рады парка. Свае праграмы дадатковай адукацыі будуць і ў Акадэміі кіравання, і паспяхова іх здаўшыя змогуць паступіць у гэтую ВНУ без іспытаў.

Касуюцца іспыты і для тых, хто паступае ў ССНУ. З 2023 года пры паступленні на ўсе спецыяльнасці сярэдняй спецыяльнай адукацыі трэба будзе падаваць выключна атэстат - сертыфікат ЦТ не спатрэбіцца.

Што тычыцца ўступнай кампаніі гэтага года, адзначыў Каспяровіч, маштабных змяненняў для абітурыентаў няма - толькі пашыраныя льготы для выпускнікоў педагагічных, вайсковых патрыятычных класаў, у іх створана больш магчымасцей для паступлення абітурыентаў з Расеі. Пра гэтыя змены ў Кодэкс аб адукацыі мы ўжо расказвалі раней.

У гэтым годзе, паведаміў прадстаўнік Міністэрства адукацыі, у ВНУ на бюджэт плануецца прыняць амаль 27,7 тысяч чалавек, на платную форму - 25,7 тысяч, на ўзровень сярэдняй спецыяльнай адукацыі хочуць набраць 39,5 тысяч чалавек. На прафтэхадукацыю - блізу 26 тысяч навучэнцаў.

Каспяровіч дадаў, што сёлета многія каледжы закрылі незапатрабаваныя спецыяльнасці і адкрылі падрыхтоўку ў прафесіях, паводле якіх раней не рыхтавалі, таму абітурыентам трэба ўважліва вывучаць сайты ўстаноў.