Ірландыя патрабуе вызваліць беларускіх палітвязняў

Дублін высока ацаніў мужнасць герояў Беларусі.

Міністр еўрапейскіх спраў Ірландыі Томас Бірн выступіў з заявай, у якой заклікаў вызваліць беларускіх палітвязняў. Яна апублікаваная на афіцыйным сайце знешнепалітычнага ведамства ў гадавіну затрымання палітвязня Сяргея Ціханоўскага.

«Спадар Ціханоўскі знаходзіцца ў турэмнай камеры з 29 траўня 2020 года. Ён атрымаў 18-гадовы тэрмін зняволення, і калі ён адбудзе яго, да моманту вызвалення яму будзе 60 гадоў. Гэты палітызаваны прысуд з'яўляецца абуральным парушэннем правоў чалавека, не кажучы ўжо пра фундаментальную чалавечую прыстойнасць», - гаворыцца ў заяве міністра.

Ён выказвае захапленне мужнасцю палітвязня, «гатоўнасцю казаць праўду ўладзе» і «рашучасцю пабудаваць лепшую будучыню для беларускага народа».

«Пры кіраванні Лукашэнкі мы сталі сведкамі прымянення дзяржаўнага гвалту супраць мірных дэманстрантаў, невыбарчых затрыманняў, абмежавання свабоды сходаў і свабоды СМІ. Ірландыя працягвае безумоўна асуджаць гэтыя парушэнні; мы заклікаем да іх неадкладнага спынення», - заяўляе ён.

«Беларускія ўлады пераследуюць людзей толькі за тое, што яны выступаюць супраць Аляксандра Лукашэнкі. Рэжым знявольвае сваіх грамадзян у турмы ў жудасных умовах, падвяргае іх жорсткаму абыходжанню і катаванням і прысуджвае іх да працяглых турэмных тэрмінаў падчас палітызаваных судовых працэсаў, якія праводзяцца за зачыненымі дзвярыма. Ірландыя неаднаразова заклікала да неадкладнага і безумоўнага вызвалення ўсіх палітычных зняволеных, адвольна затрыманых у Беларусі. Беларусь павінна прытрымлівацца сваіх міжнародных абавязанняў і абавязкаў», - падкрэслівае міністр.

«Я заклікаю ўсіх ірландцаў і дэмакратычна абраных прадстаўнікоў Ірландыі падтрымаць палітычных зняволеных Беларусі і справу, якую яны падтрымліваюць: дэмакратычную, справядлівую і свабодную Беларусь», - рэзюмаваў кіраўнік ведамства.