З Афрыкі ў Беларусь набліжаецца спякота

Будзе да +36 градусаў.

Пасля халадоў надыходзіць экватарыяльная спёка. "Анлайнер" гаворыць, што будзе градусаў на 4-6 цяплей за норму.

Поўнач не ўтрымала пазіцый, з Афрыкі да нас ірванула перагрэтае паветра. Яно, падобна, мае намер памыць боты ў Паўночным Ледавітым акіяне. Скандынавія рыхтуецца сустракаць лета. Зразумела, што ўсе гэтыя манеўры праходзяць над намі. Ціск высокі, значыць, верагоднасць ападкаў нізкая (але не нулявая, будуць некаторыя курчы).

У суботу яшчэ цярпіма, без фанатызму – ад 25 да 30 градусаў. У нядзелю паводле плану пачынаецца фанатызм – ужо да 32. У наступныя дні чакаецца нагнятанне напружанасці – да серады паўднёвы захад можа нагрэцца да 36. Начамі таксама цёпла – ад 14 да 22.

З аўторка да чацвярга ў некаторых раёнах могуць здарацца спантанныя навальніцы са святламузыкай і іншымі эфектамі.

Гідролагі гавораць, што вада ў рэках і азёрах цяпер трымаецца ў межах 15–23 градусаў – гэта памяць пра нядаўнія халады. Але гэтай памяці хопіць ненадоўга, вада награваецца, усе рвуцца купацца. Ратавальнікі рассылаюць SMS з папярэджаннямі – каб не танулі.