4 кастрычнiка 2022, aўторак, 17:29
Сім сім, Хартыя 97!
Рубрыкі

«Закрыць мне рот - не варыянт»: Дар'я Лосік апублікавала смелы зварот да Лукашэнкі

3
«Закрыць мне рот - не варыянт»: Дар'я Лосік апублікавала смелы зварот да Лукашэнкі

Жонка палітвязня гатова на крайнія меры дзеля вызвалення мужа.

Жонка палітвязня Ігара Лосіка Дар'я звярнулася да «грамадзяніна Лукашэнкі» з прапановай замяніць мужа на яе саму. Яна згодна ўзяць на сябе ўсе абвінавачванні супраць мужа пры ўмове, што ён сам і іх дачка пакінуць Беларусь. Відэазварот Дар'і апублікавала «Радыё Свабода».

- Я гатовая добраахвотна сесці ў беларускую турму і ўзяць на сябе ўсе крымінальныя артыкулы Ігара ўзамен на яго свабоду, - кажа Дар'я ў відэазвароце. - Калі вам вельмі хочацца, вы можаце накінуць мне яшчэ парачку крымінальных артыкулаў для атрымання большага задавальнення. Я іду на такі крок толькі пры ўмове, што Ігар з дачкой пакіне краіну. Вы нічога не страчваеце, бо ў вашай краме чалавечых лёсаў іх колькасць застанецца той жа.

Дар'я ўпэўнена, што яе муж невінаваты.

- Першапачаткова я падумала, што следчы камітэт напісаў тэкст для нейкага стэпдап-шоў, а не матэрыялы крымінальнай справы. Так, вы такі строгі, хочаце ўсіх нас «правучыць». Як асмеліўся гэты «народ» вам пярэчыць? Вельмі нават смее, і больш за тое, мае на гэта права, замацаванае ў Канстытуцыі нашай краіны.

Жонка палітвязня нагадала пра правы, замацаваныя ў Канстытуцыі Беларусі, у тым ліку пра права на свабоду меркавання. Таксама яна нагадала пра масавыя акцыі нязгоды ў 2020-м годзе і маштабныя рэпрэсіі, якія, на яе думку, не могуць прымусіць людзей думаць па-іншаму.

- Мяне нельга запалохаць, праходзілі, у вас не атрымліваецца. Закрыць мне рот – на жаль, таксама не варыянт. Вашы хлопцы ведаюць, дзе мяне знайсці, а вы ведаеце, што мне трэба. Усё проста, як ніколі.

Нагадаем, Ігара Лосіка асудзілі па так званай «справе Ціханоўскага». Лосік атрымаў 15 гадоў калоніі ўзмоцненага рэжыму. Па гэтай жа справе асудзілі Сяргея Ціханоўскага (18 гадоў), Арцёма Сакава, Дзмітрыя Папова (16 гадоў), Уладзіміра Цыгановіча (15 гадоў), Мікалая Статкевіча (14 гадоў).

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».