Пецярбуржскі тупічок

Навошта «дзядзька Вова» выклікаў «хлопчыка Сашу» да сябе на дыван?

Працягваем уважліва аналізаваць вычварныя «коткі-мышкі» паміж састарэлымі дыктатарамі ў сувязі з апошнімі міжнароднымі падзеямі, піша тэлеграм-канал «Белорусский стратегический».

Надышоў час апісаць узаемасувязі паміж пазіцыяй Казахстана і праблемамі Лукашэнкі.

Такім чынам, на Пецярбуржскім міжнародным эканамічным форуме прэзідэнт Казахстана Такаеў быў адзіным кіраўніком замежнай суверэннай дзяржавы.

Але прыбыў ён на гэтае мерапрыемства не з мэтай падпісаць пару-тройку гандлёва-эканамічных дамоў, а для таго, каб на самым высокім узроўні абвясціць аб канчатковым выхадзе Казахстана з-пад фактычнага расейскага пратэктарату: зараз нацыянальныя інтарэсы Казахстана перш за ўсё. І зрабіў ён гэта прыгожа, гледзячы проста ў вочы Пуціну, прадэманстраваўшы вытрымку і ўсходні спакой.

Раптоўнасць такога кроку выклікала ў Пуціна спачатку разгубленасць (ды такую, што ён па старой школьнай звычцы палез шукаць выратавання ў носе), а затым - натуральную істэрыку. Бо Казахстану, які займае важнае геапалітычнае месца, прадугледжвалася роля галоўнага «шэрага хабу» для арганізацыі паралельнага імпарту (чытай — легалізаванай на дзяржаўным узроўні кантрабанды).

Мала таго, Грузія ўпершыню з 2010 года павысіла плату за транзіт грузаў праз сваю тэрыторыю, узняўшы кошт больш як на 40% - з 70 да 120 даляраў.

Адпаведна, і крыху сумнеўныя планы ў выкарыстанні для абыходу санкцый Арменіі таксама сталі яшчэ больш прывіднымі.

А раней галоўным у гэтых справах быў кантрабандыст Лукашэнка. Але гэтым разам «калгасны лідар» мала таго, што не прыехаў асабіста на ПМЭФ, дык яшчэ і дэманстратыўна праігнараваў візіт пуцінскага спецпасланніка Мішусціна ў Менск, схаваўшыся на сваёй малой радзіме — у Александрыі, заадно праігнараваўшы і пасяджэнне Еўразійскай міжурадавай рады. Нават не прывітаў яго ўдзельнікаў!

А там быў і кіраўнік Арменіі, з якім можна было пагутарыць для ўзняцця свайго іміджу. Але не захацеў Лукашэнка, стары стаў, капрызны, баязлівы…

Таму і выклікаў тэрмінова «дзядзька Вова» «неразумнага хлопчыка Сашу» да сябе на дыван для ўмацавання ўласнага іміджу. Прымусіўшы тым самым чарговы раз пачырванець Мішусціна, які, атрымліваецца схлусіў, заявіўшы, што наступная сустрэча Пуціна і Лукашэнкі адбудзецца ў Беларусі ў рамках Форума рэгіёнаў Саюзнай дзяржавы.

Камунікацыя Пуціна і Лукашэнкі гэтым разам нейкая дзіўная выходзіць: спачатку два дні нефармальных зносін у Завідаве (але Лукашэнка не паляўнічы), а толькі затым афіцыйная сустрэча ў… Пецярбургу.

Хутчэй за ўсё, Пуцін плануе за два дні пераканаць у нечым Лукашэнку. І пра гэта «нешта» публічна абвесцяць у Піцеры. Што гэта будзе: уваходжанне Беларусі ў склад РФ, ці Саюза трох дзяржаў (Расея, Беларусь і новая Украіна пад кіраўніцтвам Януковіча), ці нешта яшчэ, не бярэцца прадказаць ніводзін аналітык. Таму што прагназаваць дзеянні і ўчынкі вар'ятаў немагчыма.