Украіна і Нямеччына падпісалі пагадненне аб гранце на 1 мільярд еўраў

Сродкі будуць накіраваныя на фінансаванне першачарговых сацыяльных і гуманітарных выдаткаў.

Міністр фінансаў Украіны Сяргей Марчанка і міністр фінансаў Нямеччыны Крысціян Лінднэр 24 чэрвеня падпісалі пагадненне паміж урадамі дзвюх краін аб наданні Украіне 1 млрд еўраў грантавага фінансавання. Пра гэта паведаміла прэсавая служба Міністэрства фінансаў Украіны, піша "Европейская правда".

Сродкі будуць накіраваныя ў дзяржаўны бюджэт Украіны для фінансавання першачарговых сацыяльных і гуманітарных выдаткаў падчас ваеннага становішча праз механізм адміністрацыйнага рахунку МВФ.

Марчанка падзякаваў Лінднэру і ўсім, дзякуючы чыім намаганням выпала хутка структураваць пагадненне.

"Мы спадзяемся атрымаць сродкі ўжо найбліжэйшым часам. Гэты грант – надзвычай важкі ўклад для падтрымкі нашай дзяржавы ў гэты няпросты час. Мы шануем дапамогу ад урада Федэрацыйнай Рэспублікі Нямеччыны", - адзначыў Сяргей Марчанка.

З пачатку паўнамаштабнай узброенай агрэсіі Расеі Украіна атрымала ад урада Нямеччыны доўгатэрміновае льготнае крэдытаванне агульнай сумай 300 млн еўраў для фінансавання дзяржаўнага бюджэту.

Нагадаем, днях Украіна пачала атрымліваць ад Нямеччыны першае цяжкае ўзбраенне, такое як самаходныя артылерыйскія ўстаноўкі Panzerhaubitze 2000.