Праца ў спёку ў Беларусі: Каму належыць кароткі працоўны дзень?

Нюансы працы пры +30 для працаўнікоў офіса, працоўных у цэхах і ўкладнікаў асфальту на вуліцы.

Беларусь захліснула першая гэтым летам хваля спякоты. А многім жа пры +30 даводзіцца працаваць. Разбіраемся, ці можна паводле закону сысці з працоўнага месца, дзе вельмі горача, зрушыць час працы на позні вечар і патрабаваць вады і кандыцыянера, піша «Комсомолка».

Для некага горача і пры 25, а для некага і пры 32 – нармальна. Моцная спёка – гэта ўсё ж +30… +34 градусы.

Ахову працы ніхто не адмяняў ні ў холад, ні ў спякоту. Працадаўца паводле дзейнага заканадаўства павінен забяспечыць вытворчы камфорт на працоўным месцы, няхай гэта будзе офіс або заводскі цэх. Усе нюансы – у гэтым матэрыяле. Калі ёсць небяспека для здароўя, а тым больш для жыцця – спецыяліст мае права адмовіцца ад працы. Але проста так узяць і сысці з працы з гэтай нагоды нельга, інакш можна і дайсці да звальнення. Гэта можна зрабіць толькі з ведання наймальніка.

Калі ў офісе няма кандыцыянера, а значыць няма астуджэння і тэмпература ў памяшканні 28,5 градуса – працоўны дзень «белых каўнерыкаў» у офісах павінен быць скарочаны на 1 гадзіну. Падстава – Гігіенічны нарматыў N 33 (п. 25 СанПіН N 33). Рэальна і зрушыць пачатак і канец працоўнага дня, калі няма неабходнасці працаваць з кліентамі ці наведвальнікамі строга паводле гадзінаў.

А калі 28,5 градуса ў гарачым цэху – то працоўны дзень толькі 4–5,5 гадзінаў.

Тым, хто ў спякоту за 30 працуе пад адкрытым небам, павінны быць прадугледжаныя дадатковыя 5–10-хвілінныя перапынкі ў цяньку. І не проста пад найбліжэйшым дрэвам, а ў адведзеным памяшканні. Падстава – арт. 135 Працоўнага кодэкса, арт. 29 Закона аб ахове працы. Ваду такім супрацоўнікам павінны падвозіць і раздаваць абавязкова. Акрамя таго, іх працоўны дзень можа быць падзелены на часткі, і перапынкі паміж гэтымі часткамі могуць складаць не менш за 2 гадзіны.