Выпуск з медычных ВНУ сёлета толькі на 45% кампенсоўвае нястачу лекараў
4- 27.06.2022, 18:27
- 4,116
Аб гэтым заявілі ў Міністэрстве аховы здароўя.
У 2022 годзе беларускія медычныя ВНУ выпусцілі 2007 маладых спецыялістаў, з іх 1893 прыйдуць працаваць у дзяржаўныя ўстановы аховы здароўя. Аб гэтым заявіла першая намесніца міністра аховы здароўя Алена Краткова на цырымоніі ўручэння дыпломаў у Беларускім дзяржаўным медыцынскім універсітэце, паведамілі ў прэсавай службе Міністэрства аховы здароўя.
Са слоў Кратковай, кожны 10-ы будучы лекар скончыў навучанне з чырвоным дыпломам.
Размяркоўвалі выпускнікоў у залежнасці ад патрэб клінік. Так, кожны пяты размеркаваны ў менскія паліклінікі ды шпіталі, па 15% - у Гомельскую, Берасцейскую, Менскую вобласці. На астатнія рэгіёны прыпадае па 10% выпускнікоў.
- Але, вядома, гэты выпуск не зможа цалкам задаволіць патрэбы аховы здароўя, - паскардзілася намесніца міністра.
Краткова заявіла, што сёлетні выпуск зможа толькі на 45% запоўніць нястачу медперсаналу, і "звязана гэта з аб'ектыўнымі прычынамі".
Рэч у тым, патлумачыла яна, што ў 2016 годзе набор студэнтаў на медыцынскія спецыяльнасці быў скарочаны на 342 чалавекі. Аднак з таго часу выпускі растуць, а сёлета прыйманне павялічанае яшчэ на 50 бюджэтных месцаў.
Краткова дадала, што ў кожнай установе аховы здароўя патрэба ў кадрах розная: "Дзесьці не стае анэстэзіёлагаў, а, напрыклад, у Магілёўскай вобласці — педыятраў, у Менску ёсць пытанні з лекарамі агульнай практыкі ды хуткай дапамогі".
Каб залучыць медыкаў, паводле ейных слоў, прапрацоўваецца пытанне з жыллём. Напрыклад, прапануецца варыянт выкупіць ва ўласнасць арэнднае жытло пры ўмове працы 15 гадоў у адной медычнай установе.
Таксама разглядаецца пытанне спрошчанага допуску шэрага лекараў-спецыялістаў да сумежнай спецыяльнасці дыягнастычнага профілю. Напрыклад, лекар-эндакрынолаг пасля праходжання спецыяльных курсаў павышэння кваліфікацыі зможа выконваць УГД шчытападобнай залозы, а кардыёлаг - УГД сэрца і г.д.
У стадыі распрацоўкі законапраект аб рэзідэнтуры.
- Ёсць шэраг іншых прапаноў, якія мы разглядаем і плануем ажыццявіць для таго, каб нашай моладзі было матэрыяльна цікава працаваць у ахове здароўя, і яны мелі магчымасць прафесійна ўдасканальвацца і расці, - дадала намесніца міністра.