«Прыёрбанк» забараніў пераводзіць еўры і даляры на рахункі «Альфа-Банка»
1- 29.06.2022, 10:46
- 6,386
Беларускія кліенты сутыкнуліся з новай праблемай.
Кліенты "Прыёрбанка" сутыкнуліся з забаронай праводзіць плацяжы і пераводы ў далярах ЗША і еўрах на рахункі беларускага ЗАТ "Альфа-Банк", піша "Наша Ніва".
"Паведамляем вам, што плацяжы на карысць кліентаў банкаў-нерэзідэнтаў Рэспублікі Беларусь з удзелам арганізацый групы "Альфа-Банк" і АКБ "Капіталбанк" (Узбекістан) у далярах ЗША і еўрах будуць адхіляцца банкам у сувязі з унутранай палітыкай RBI", – такое паведамленне атрымліваюць кліенты банка пры спробе здзейсніць перавод на рахунак беларускага ЗАТ "Альфа-банк".
Пад RBI у паведамленні маецца на ўвазе Raiffeisen Bank International. Нагадаем, асноўным бенефіцыярным уласнікам "Прыёрбанк" ААТ з'яўляецца Raiffeisen Landesbanken Holding AG (Аўстрыя) – даччыная кампанія Raiffeisen Bank International AG.
ЗАТ "Альфа-банк" належыць міжнароднаму фінансаваму кансорцыуму "Альфа-груп". У красавіку расейскі "Альфа-банк" патрапіў пад блакавальныя санкцыі ЗША. Раней ЕЗ уводзіў абмежавальныя захады супраць гэтага банка. Мэнэджмэнт беларускай дачкі мяркуе, што гэтыя санкцыі не распаўсюджваюцца на беларускі банк.