Спецдакладчыца ААН прадставіла даклад пра Беларусь

У ААН заклікалі не адсоўваць сітуацыю з правамі чалавека ў нашай краіне на другі план.

Спецыяльная дакладчыца ААН аб сітуацыі з правамі чалавека ў Беларусі Анаіс Марын прадставіла Радзе правоў чалавека ААН штогадовы даклад аб сітуацыі ў нашай краіне. Марын заклікала не адсоўваць сітуацыю з правамі чалавека ў Беларусі на другі план на фоне крызісных сітуацый ва ўсім свеце, паведамляе прэс-служба Управы вярхоўнага камісара правоў чалавека ААН.

На думку Марын, сітуацыя з правамі чалавека ў Беларусі працягвае імкліва пагаршацца, апускаючы краіну ў атмасферу страху і беззаконня, заканадаўства працягвае сістэматычна ўзмацняцца жорсткасць, абмяжоўваючы грамадзянскія і палітычныя правы. Як адзін з прыкладаў гэтай тэндэнцыі яна падае канстытуцыйны рэферэндум.

"Рэформа, ініцыяваная гэтым рэферэндумам, раўнасільная ўмацаванню і сістэматызацыі перашкод на шляху рэалізацыі правоў чалавека беларускімі грамадзянамі", - заявіла Марын.

Таксама спецдакладчыца ўстурбаваная папраўкамі ў Крымінальны кодэкс, якія яшчэ больш абмяжоўваюць свабоду мірных сходаў і выказвання меркавання, і адвольным ужываннем заканадаўства, якое ўжо з'яўляецца абмежавальным.

Марын выказала ўстурбаванасць папраўкамі ў КК, якія пашыраюць выкарыстанне пакарання смерцю.

"Я вельмі ўстурбаваная тым, што шырокае і туманнае вызначэнне "тэрарыстычных актаў" можа быць вытлумачанае як адвольныя дзеянні, накіраваныя на законнае ажыццяўленне асноўных правоў", – заявіла Марын.

У сваім дакладзе Марын звярнула ўвагу на знішчэнне незалежных НДА, СМІ і культурных арганізацый у Беларусі, а таксама на перашкоды працы праваабаронцаў і адвакатаў.

"Скарачэнне грамадзянскай прасторы беспрэцэдэнтна паскорылася ў выніку сістэматычнай і мэтанакіраванай палітыкі выкаранення кожнага фактычнага або меркаванага супрацьстаяння дзейнаму ўраду", - заявіла Марын.

На думку спецдакладчыка, "сістэматычныя парушэнні правоў чалавека і беспакаранасць за гэтыя злачынствы занурылі Беларусь у атмасферу беззаконня і страху". Яна заклікае беларускія ўлады спыніць сістэматычныя парушэнні правоў чалавека, правесці незалежныя расследаванні і прыцягнуць вінаватых да адказнасці.