Жыхар Жабінкі сарваў пікет БРСМ супраць польскіх уладаў

Лукашысты абвінавацілі смелага мужчыну ў хуліганстве і адправілі пад суд.

Каля будынка генеральнага консульства Польшчы ў Берасці 19 красавіка адбыўся пікет БРСМ «супраць дзеянняў польскіх уладаў па зносе помнікаў воінам-вызваліцелям». Як сцвярджае пракуратура, мужчына, які праходзіў побач, абражаў удзельнікаў пікету. Паводле звестак праваабаронцаў, ён выгукнуў ім: «Без Лукашэнкі!» Яго абвінавацілі ў хуліганстве і далі паўтара гады «хіміі», паведамляе zerkalo.io.

Паводле інфармацыі пракуратуры, «ён груба парушаў грамадскі парадак і выказваў відавочную непавагу да грамадства, дзейнічаючы з выключным цынізмам, выкрыкваў зневажальныя выказванні, а таксама рэплікі з выкарыстаннем нецэнзурнай лексікі на адрас удзельнікаў пікету». Паводле інфармацыі праваабаронцаў, праходзячы побач з удзельнікамі пікету ён крыкнуў «Без Лукашэнкі».

Суд Ленінскага раёна Берасця прызнаў мужчыну вінаватым у хуліганстве (ч.арт.339 КК Беларусі) і вынес прысуд - 1,5 гады «хіміі».

Прысуд не набыў законную моц і можа быць абскарджаны і апратэставаны ў апеляцыйным парадку.