Беларусы адмаўляюцца ад паходаў у кавярні і рэстарацыі

Колькасць наведвальнікаў у грамадскім харчаванні абвалілася на 30%.

Экспэрты NAI Belarus прадэманстравалі актуальны агляд і тэндэнцыі рынку грамадскага харчавання горада Менска.

У першым паўгоддзі 2022 года ў горадзе Менску функцыянавала практычна 3,65 тысячы ўстаноў грамадскага харчавання. У апошнія некалькі гадоў у сталіцы найбольш масава адчыняліся кавярні.

Пад катэгорыю «кавярня», асабліва «міні-кавярні», могуць трапляць не толькі класічныя кавярні з дастатковай колькасцю пасадачных месцаў, але і кампактныя папулярныя кропкі продажу шаўрма і іншыя ўстановы. Іх не вылучаюць у асобную катэгорыю грамадскага харчавання, але па колькасці новых адкрыццяў яны ў лідарах.

Аналізуючы лакацыі, у якіх у апошні час адчыняюцца аб'екты, варта адзначыць, што ўстойлівую дзель займае такое размяшчэнне, як «аб'ект на гандлёвых пляцах крамы».

Улавіўшы хвалю папулярнасці харчавання ў грамадскіх установах, гандлёвыя сеткі пачалі фармаваць фуд-зоны ўнутры гандлёвых залаў. Гэта выразна назіраецца апошнія гады тры. У залежнасці ад пляца крам гэта могуць быць зусім розныя па памеры і ўзроўню прапановы аб'екты: ад невялікага салата-бара з кавамашынай да маштабнага фуд-корту з разнастайнай прапановай ці нават кавярня самаабслугоўвання з пасадачнымі месцамі.

Попыт на паслугі ўстаноў грамадскага харчавання, безумоўна, упаў, што пацвярджае запаволенне тэмпаў росту РТА. На піку нестабільнасці ў сакавіку адзначалася зніжэнне патоку на 25-30 працэнтаў. Выклікана гэта было новай хваляй рэлакацыі, у ліку якой аказалася дастаткова шмат плацежаздольных пастаянных кліентаў устаноў.

З красавіка-траўня сітуацыя трохі стабілізавалася, бо спрасціўся ўезд у Беларусь грамадзян РФ на асабістым аўтатранспарце, а пазней быў дазволены бязвіз для грамадзян краін Балтыі. За кошт гэтых катэгорый, асабліва ў перыяды доўгіх выходных, запаўняльнасць устаноў грамадскага харчавання расла.

Пасля перыяду піка росту папулярнасці сушы-бараў на рынку Менска назіраўся ўхіл на еўрапейскую кухню. Цяпер у трэндзе адкрыццё аб'ектаў усходняй кухні: кітайскай, турэцкай, індыйскай і інш. Спецыфіка бягучага перыяду - аб'екты адкрываюцца менавіта прадстаўнікамі гэтых этнічных груп. Прадстаўнікі краін «усходняга вектара» прысутнічаюць і сярод пакупнікоў нерухомасці пад грамадскае харчаванне ва ўласнасць, піша belretail.by.

Агулам, доля замежнага бізнэсу не дамінантная, але і не маленькая. Калі параўнаць з іншымі сектарамі эканомікі і напрамкамі бізнэсу ў Рэспубліцы Беларусь, яе можна ахарактарызаваць як значную. Замежны бізнэс у грамадскім харчаванні Менска займае амаль 16% у РТА сектары.