Актрыса Купалаўскага тэатра, якая выступала на адкрыцці алкамаркета ў Маладзечне, атрымала званне народнай артысткі
8- 5,800
Званне народнай артысткі атрымала Тамара Міронава.
Лукашэнка ў нядзелю 3 ліпеня ў Вялікім тэатры Беларусі ўзнагародзіў некалькіх працаўнікоў культуры. Званне народнай артысткі атрымала актрыса Купалаўскага тэатра Тамара Міронава.
Актрыса падзякавала Лукашэнку за падтрымку беларускай культуры.
“Вы адкрылі новыя старонкі ў нашым тэатры. Тэатры дзяржаўным, нацыянальным. Тэатры імя Янкі Купалы. Вы нам паверылі, і мы вас не падвялі. Я ганаруся, што ў нас цяпер ёсць рэжысёр, маладыя артысты, што нараджаецца новы малады тэатр. Гэта выдатна”, – сказала яна.
Тамара Міронава разам з цяперашнім мастацкім кіраўніком Купалаўскага Вольгай Няфёдавай у чэрвені 2021 года выступіла на адкрыцці крамы алкагольных напояў у Маладзечне. Яны прапанавалі публіцы ўрывак спектакля з рэпертуару Купалаўскага тэатра "Паўлінка". Пазней Няфёдава скардзілася, што ёй і Тамары Міронавай не даюць здымацца ў кіно. У гэтым яна абвінаваціла "змагароў з рэжымам".