У Кіеве ліквідавалі канал легалізацыі расейцаў ва Украіне

Нелегалаў маглі выкарыстоўваць спецслужбы РФ.

У Кіеве праваахоўнікі ліквідавалі канал незаконнай легалізацыі расейцаў, якія ўцяклі з РФ ва Украіну. Кошт паслуг для нелегалаў складаў ад 10 да 15 тысяч даляраў ЗША.

Пра гэта паведамілі ў прэс-службе галоўнай управы СБУ ў Кіеве і вобласці. Зламыснікам пагражае да 10 гадоў пазбаўлення волі.

«СБУ ліквідавала магутны канал незаконнай легалізацыі расейцаў, якія ўцяклі з Расеі ва Украіну. Служба бяспекі абясшкодзіла арганізаваную групоўку, якая займалася супрацьпраўнай легалізацыяй замежнікаў у нашай дзяржаве. Яе кліентамі былі грамадзяне Расеі і краін з падвышанай тэрарыстычнай пагрозай з Блізкага Усходу і Цэнтральнай Азіі. Паводле звестак СБУ нелегалаў маглі выкарыстоўваць спецслужбы РФ для правядзення выбуховай дзейнасці падчас поўнамаштабнай агрэсіі супраць Украіны», - распавялі ў прэс-службе.

Арганізатарам канала легалізацыі замежнікаў выявіўся намеснік начальніка Цэнтральнай міжрэгіянальнай управы Дзяржаўнай міграцыйнай службы ў Кіеве і вобласці.

Пад яго кіраўніцтвам удзельнікі схемы «гарантавалі» замежнікам выдачу дазволу на часовае або сталае пражыванне ва Украіне, а таксама пасведчанне бежанцаў.

Акрамя таго, дзялкі абяцалі нелегалам працаўладкаванне ў Кіеве і Львове ў сэрвісах хуткай дастаўкі. Кошт паслуг зламыснікаў складаў ад 10 да 15 тысяч даляраў, у залежнасці ад краіны паходжання, тыпу дакумента і тэрмінаў яго афармлення. Паводле інфармацыі следства, частка нелегалаў спрабавала ў далейшым з'ехаць у краіны ЕЗ», - удакладнілі ў СБУ.

У прэс-службе дадалі, што арганізатара схемы і яго суўдзельніка затрымалі падчас атрымання грошай у суме $10 тысяч.

Падчас вобыскаў праваахоўнікі знайшлі амаль 13 млн у грыўнях. Зламысніку паведамілі аб падазрэнні ў незаконнай перапраўцы асоб праз дзяржмяжу Украіны і прыняцце неправамернай выгады службовай асобай.