Эмігранты распрадаюць у Беларусі загарадную нерухомасць
11- 4.07.2022, 17:37
- 30,662
Такая ж сітуацыя назіраецца і на рынку кватэр.
Амаль 18% -20% аб'ектаў загараднай нерухомасці прадаюцца па даверанасці. Такія звесткі агенцтва нерухомасці «Твая сталіца». Прадстаўніца агенцтва Ларыса Самусенкава мяркуе, што гэта маёмасць тых, хто з'ехаў з краіны.
Для параўнання, на рынку кватэр па даверанасці прадаецца амаль 12%.
«Справа ў тым, што кватэру звычайна прадаюць у тым выпадку, калі дакладна не збіраюцца вяртацца. А загарадную нерухомасць прадаюць як «найменшае са страт», - цытуе экспэрта Realt.by.
Агенцтва «Этажы» фіксуе рост прапановы на рынку і звязвае гэта з тым, што многія людзі з'ехалі з Беларусі.
Гаворка ідзе не толькі пра апошні віток рэлакацыі пасля лютаўскіх падзей, але і пра тых, хто з'ехаў год ці два таму. Цяпер яны зразумелі, што застануцца за мяжой, прадаюць нерухомасць. Такую сітуацыю мы бачым і на рынку кватэр, але з дамамі і дачамі сітуацыя больш відавочная, бо загарадная нерухомасць прадаецца даўжэй.
Усе гульцы рынка фіксуюць актывізацыю пакупнікоў. Праўда, попыт цяпер зрушыўся на самы нізкі коштавы сегмент - старыя летнія дамкі.