У Беларусі ўвялі падатковую навіну
1- 4.07.2022, 20:56
- 34,576
Для тых, хто выязджае на адпачынак за мяжу.
У Беларусі ўвялі падатковую навіну для тых, хто выязджае адпачываць за мяжу. Змяненне можа быць важным для тых, для каго ўзнікне пытанне падатковага рэзідэнцтва, піша zerkalo.io.
У Беларусі за падатковага рэзідэнта ўважаюцца тыя, хто прабыў у краіне больш за 183 дні за год. Пры падліку колькасці дзён, якія чалавек правёў у краіне, улічваюць адпачынак за мяжой. Да гэтага года дзейнічала такое правіла: калі ў сукупнасці такі адпачынак склаў больш за два месяцы за адзін каляндарны год, то ён не ўлічваўся пры падліку тэрміну знаходжання ў Беларусі. Напрыклад, калі чалавек быў за мяжой два месяцы і адзін дзень, то гэты перыяд не ішоў у перыяд знаходжання ў нашай краіне, а калі менш за два месяцы, то ўлічваўся.
Але ў гэтай сітуацыі ўзнікала пытанне, што лічыць за два месяцы, бо, напрыклад, у лютым 28 дзён (калі гэта не высакосны год), а ў чэрвені – 30.
З гэтага года ў Падатковы кодэкс увялі змяненне, у дакуменце два месяцы замянілі на 60 каляндарных дзён. Калі перавысіць колькасць гэтых дзён, то ўвесь перыяд такога знаходжання за мяжой не будзе ўлічвацца пры падліку тэрміну знаходжання на тэрыторыі Беларусі.