Студэнтку-выдатніцу адправілі ў калонію на шэсць гадоў за антываенны допіс
23- 5.07.2022, 16:05
- 25,840
Адразу пасля завядзення крымінальнай справы яна была адлічаная.
У Кіраўску абвясцілі прысуд студэнтцы Дануце Пярэдні, якую КДБ уключыў у спіс асоб, што маюць дачыненне да тэрарыстычнай дзейнасці, паведамляе праваабарончы тэлеграм-канал «Mayday».
Прысуд дзяўчыне абвясцілі 1 ліпеня. Яе прызналі вінаватай у дзеяннях, накіраваных на прычыненне шкоды нацыянальным інтарэсам Рэспублікі Беларусь (ч.3 арт.361 КК РБ) і абразе Лукашэнкі (ч.1 арт.368 КК РБ). Дануце прысудзілі шэсць з паловай гадоў калоніі агульнага рэжыму.
Нагадаем, 20-гадовая студэнтка спецыяльнасці «рамана-нямецкая філалогія» МДУ ім. А.А. Куляшова была затрыманая сілавікамі 28 лютага 2022 года, калі прыехала на маршрутцы з Кіраўска ў Магілёў.
Паводле інфармацыі праваабаронцаў, яе абвінавацілі ў тым, што 27 лютага яна перапосціла ў адзін з магілёўскіх чатаў тэкст, у якім у рэзкай форме крытыкаваліся дзеянні Уладзіміра Пуціна і Аляксандра Лукашэнкі па развязванні вайны ва Украіне. Таксама там змяшчаўся заклік да вулічных выступаў.
10 чэрвеня Камітэт дзяржаўнай бяспекі ўнёс Дануту Пярэдню ў спіс «асоб, якія маюць дачыненне да тэрарыстычнай дзейнасці».
Пярэдня была студэнткай-выдатніцай і мела толькі станоўчыя характарыстыкі ад педагогаў. Аднак адразу пасля завядзення крымінальнай справы яна была адлічаная.