Навукоўцы расказалі пра чыннікі, якія выратавалі тысячы паджылых людзей ад хваробы Альцгеймера

Даследнікі з ЗША зрабілі незвычайнае медыцынскае адкрыццё.

Спецыялісты з Цэнтра медыцынскіх навук Тэхаскага ўніверсітэта ў Х'юстане высветлілі, што штогадовае прышчэпліванне паджылых людзей ад грыпу звязана з больш нізкай імавернасцю развіцця хваробы Альцгеймера. Даследаванне двух мільёнаў добраахвотнікаў цягам чатырох гадоў паказала: кагнітыўныя парушэнні радзей развіваюцца ў тых, хто прышчэпліваўся. Пры гэтым, чым даўжэй людзі ўдзельнічалі ў вакцынацыі, тым лепш былі абароненыя, піша «Вокруг света».

Са звестак навукоўцаў, толькі ў ЗША колькасць людзей з гэтым дыягназам перавышае 6 мільёнаў. Некаторыя даследаванні паказалі, што паказчык зніжаецца, калі своечасова лячыць захворванні сардэчна-сасудзістай сістэмы. Таксама былі здагадкі, што сістэмныя імунныя рэакцыі, якія ўплываюць на мозг, могуць адбівацца на развіцці Альцгеймера.

Вядома, што са зніжэннем кагнітыўных здольнасцяў, асабліва сярод паджылых, звязаныя інфекцыі і небяспечныя для чалавека мікраарганізмы. У тым ліку рэспіраторныя вірусныя захворванні (грып), пнеўманія, герпес, інфекцыі мочавыводных шляхоў і ЖКТ, нядаўна далучыўся да гэтага спісу ковід і многія іншыя.

Аўтары новага даследавання вылучылі гіпотэзу, што прадухіленне гэтых інфекцый або паслабленне іх можа дапамагчы захаваць кагнітыўныя функцыі і адтэрмінаваць або знізіць рызыку развіцця дэменцыі. Не захварэць ці лягчэй перанесці інфекцыю людзям традыцыйна дапамагаюць прышчэпкі.

Для праверкі навукоўцы выбралі вакцынацыю супраць грыпу, якая праводзіцца штогод. У даследаванні ўдзельнічалі больш за 1 мільён 800 тысяч чалавек ва ўзросце ад 65 гадоў і старэйшых, без дэменцыі і нават лёгкіх кагнітыўных парушэнняў. Роўна палова з іх была прышчэпленая ад грыпу хаця б раз.

Назіранні праводзіліся чатыры гады. За гэты час хвароба Альцгеймера развілася ў 8,5% невакцынаваных пацыентаў і ў 5,1% вакцынаваных. Розніца склала амаль 32 тысячы чалавек. З высновы аўтараў, гэта дастаткова моцны ахоўны эфект.

Аднак навукоўцы прызнаюцца, што механізм дзеяння ім па-ранейшаму не да канца зразумелы і патрабуе далейшага вывучэння. Даследчыкі таксама плануюць высветліць, ці дапамагае прышчэпка людзям, у якіх ужо ёсць дыягназ дэменцыя, у тым ліку яе разнавіднасць - хвароба Альцгеймера, піша Sci-news.com.