Век жыві: навукоўцы прыдумалі дыету, якая павялічвае працягласць жыцця

Рацыён распрацавалі на аснове харчавання рэкардсменаў па колькасці пражытых гадоў.

Нутрыцыёлагі са Школы геранталогіі імя Леанарда Дэвіса Універсітэта Каліфорніі прааналізавалі лад жыцця паджылых людзей з рэгіёнаў з найбольшай працягласцю жыцця і прыдумалі «дыету даўгалецця». У даследаванне ўвайшлі звесткі аб рацыёне жыхароў Акінаўскіх астравоў (Японія), выспы Ікарыя (Грэцыя), горада Лома-Лінда (Каліфорнія, ЗША), паўвострава Нікоя (Коста-Рыка), асобных населеных пунктаў Сардзініі (Італія). Менавіта ў пералічаных месцах па статыстыцы больш за ўсё доўгажыхароў.

Адразу абмовімся, што некаторых рэкамендацый можна прытрымлівацца толькі пасля абмеркавання з тэрапеўтам. Напрыклад, каліфарнійскія навукоўцы раяць прытрымлівацца пяцідзённага цыклу галадання хаця б раз на некалькі месяцаў, абмяжоўваць час прыёму ежы 12-гадзінным інтэрвалам, знізіць ужыванне мяса і павялічыць колькасць расліннага бялку.

Складаныя вугляводы, якія можна атрымліваць з круп, мукі цэльнага зерня, садавіны і гародніны, павінны даваць палову дзённай колькасці калорый. Раслінных тлушчаў, якія атрымліваюцца з алею, авакада, аліваў, семачак, павінна быць не менш за 30%. Доля бялку - усяго 10-15%. Тым, хто займаецца спортам, гэты паказчык можна ўзняць да 20 адсоткаў.

Прапанаваны навукоўцамі рацыён збольшага падобны на міжземнаморскую дыету (нездарма сярод тых, чыё харчаванне стала аб'ектам даследавання, былі грэкі і італійцы). Асноўныя прадукты: бабовыя, цэльнае зерне, гародніна, крыху рыбы, арэхі, аліўкавы алей. Нельга есці чырвонае ці апрацаванае мяса, варта абмежаваць цукар і рафінаваны зерне.

Кіраўнік даследавання доктар Лонга называе распрацаваны варыянт харчавання эвалюцыяй «стогадовых дыет».

Навукоўцы падкрэсліваюць: рацыён неабходна карэктаваць пад кожнага чалавека асобна, а рабіць гэта лепш пад наглядам лекара. Напрыклад, паджылым людзям доктар Лонга раіць крыху павялічыць колькасць бялку, каб супрацьстаяць старэнню арганізма і атрафіі цягліц.